Ада чир-суғ арачылағҷызы кӱні

Рувики тiп сайттаң
Presidential-library-icon.svg

Тузаланылған материаллар

Б. Н. Ельциннің адынаң Президент библиотеказынаң алылғаннар

Пу статьяда Б. Н. Ельциннің адынаң Президент библиотеказының чыындызының
материаллары тузаланылча
Ада чир-суғ арачылағҷызы кӱні
Орден Красной Звезды.jpg
Тӧстелген 1922 чылда
Таныхталчатхан орны чыл сай
Кӱні 23 февральда
Палғалыстығ 1918 чылның азығ айындағы Тоғысчы-кресеннернің Хызыл Армиязының герман войсколарынаң тоғыр чаалазығларынаң
Логотип РУВИКИ.Медиа Медиафайлы на РУВИКИ.Медиа

«Ада чир-суғ арачылағҷызы кӱні» — Россияда паза СССР-ның республикаларында чыл сай 23 февральда таныхталчатхан ӱлӱкӱн. 1922 чылдаң сығара СССР-да пу кӱн чыл сай кибірли «Хызыл Армия кӱні» чіли таныхталҷаң, 1946 чылдаң сығара— Совет армиязының кӱні, 1949 чылдаң сығара 1992 чылға теере — Совет армиязының паза Чаа-талай флодының кӱні. 23 февраль чааҷылардаң пасха прай совет кізілеріне тоғыс кӱні полған[1].

Совет Союзы изел парған соонда, Россияда ӱлӱкӱн Ада чир-суғ арачылағҷызы кӱні чіли таныхталча паза Россияның чааҷы сабланызы кӱні полча. Ада чир-суғ арачылағҷызы кӱні — арачыланыс киреенең палғалыстығ ир кізілернің паза ипчілернің ӱлӱкӱні[2].

Ӱлӱкӱннің тӧстелгені

[тӱзедерге | код тӱзедерге]

Россия империязында 1917 чылдағы революцияа теере 26 ноябрьда Георгий кавалерлері кӱнін таныхтаҷаңнар. Ол 1769 чылда Георгий кірезі орден тӧстелгеніне чарыдылған. Ада чир-суғның арачылағҷыларына теелген анаң улуғ ӱлӱкӱн чох полған[3].

Тархын[тӱзедерге | код тӱзедерге]

15 (28) январьда 1918 чылда Совет Россияның Чон комиссарларының чӧбі Тоғысчы-кресеннернің Хызыл Армиязын тӧстирінеңер Декретті чарыхха сығарыбысхан (20 январьда (2 февральда) 1918 чылда большевиктер правительствозының печать органында чарых кӧрген)[4]). Фронтта пос кӧңнінең чааҷы поларға итчеткеннернің наа армияа пазыныс пасталған, оларнаң Хызыл армия роталары тӧстелгеннер, олар, тізең, полктарға кіргеннер[5].

18 февральда Германияның паза Австрия-Венгрияның войсколары прай Іскеркі фронтча чаанаң кір сыхханнар. 21 февральда Петроградтың революция арачыланызының комитеді тӧстелген, аның пазы Яковом Свердлов полыбысхан. 22 февральда иирде Петроградсар Владимир Лениннің хығыртиинаң Могилёвтаң Ӧӧркі главнокомандующайның штабының пастығы, генерал полған Михаил Бонч-Бруевич читкен. Ол Совет Союзын тастындағы ыырҷыдаң арачылаан. Лениннең паза ӱлгӱнін пасха кізілерінең ӱзӱріг апарған соонда, Бонч-Бруевич Смольнайда тоғын сыххан, анда Лениннің кабинедінең хости комнатада орын тапхан[6].

Ревель, Псков паза Нарва городтарзар Германияның 8-ҷі армиязының войсколары чаанаң кіргеннер. Андар алты дивизия паза нинҷе-де пасха часть кірген. Псков саринзар Германияның 5 полкы кірген[7]. Немецтер доброволецтер отрядтары кӱзінең кір турғаннар, «тоғырланысха учурабин» олар поездтерде, автомашиналарда паза саналығ ағырин тартылчатхан ӧӧн кӱстернең илееде алнында парчатханнар»[8]. Немецтернің парчатхан табыраа хоныхта 50 км читчең[9]. Пинск — Двинск — Рига линиязынаң сығып, немецтер чаанаң кіргеннең пір неделя аразында Минск, Полоцк, Псков, Ревель городтарға кіргеннер.

23 февральда 1918 чылда СНК-ның 21 февральда алылған «Социалистическай ада чирі хорғыста!]]» айланызы чарыхха сыххан[10], ідӧк Николай Крыленко «Чаа главнокомандующайының хығыртии», хайзы тоозылған сӧстернең: «<…> Прайзы тирігні холға алыңар. Прайзы революция арачыланызы ӱчӱн турыңар. Окоптар хазар ӱчӱн прай чирдегі мобилизация паза окоп отрядтарын ызары советтерге чахылча, полған на отрядха нандырығлығ хырығлары чох полномочиеліг комиссарлар турғызыларға киректер. Пу чахығ прай городтарның советтеріне инструкция чіли тарадылча»[10]. 23 февральда СНК кнезі Ленин «Правда» газетада «Амыр чуртас алай чаа» статьяны чарыхха сығарыбысхан, хайзында сағамох амыр чуртасха кӱстеен; статья соонда ол хығырған:

… революция армиязын чоохтарнаң паза хысхырғанынаң нимес тимнирге (хайди аны 7 январьдаң сығара пістің тисчеткен войсколарны тохтадарға даа итпеен кізілер тимнееннер), че тимнег тоғызынаң, киректең, кӱстіг, илбек, тиксі чонның армиязын тӧстеп идерге.

23 февральда килкім городтарда кӧп чон араласхан митингтер ирткеннер, Хызыл армияа кӧп доброволецтер пазын сыххан. 25 февральда фронтха пастағы Хызыл армия отрядтары парыбысханнар[11].

23 февраль соонаң хызыл отрядтар герман чааҷыларына тоғырланыс кӧзіт сыхханнар. Валка городха кірген немец частьтары латыш атығҷыларының отрядынаң чаалас сыхханнар. 24 февральда сыххан «Правда» газетада таныхталған: «Валкада немец ударниктерінің латыштарның 300 кізі отрядынаң тоғыр чаалазығ парча». Псков алтында, Ревель (Таллин) алтында, Гдов хыринда чааласханнар[7][11].

  • Тоғысчы-кресннернің Хызыл армиязын тӧстирінеңер СНК декреді В. И. Лениннің тӱзедіглерінең хада

    Тоғысчы-кресннернің Хызыл армиязын тӧстирінеңер СНК декреді В. И. Лениннің тӱзедіглерінең хада

  • Генерал фон Эйхгорн азымахтап алған Минскте, 1918 чылның азығ айы

    Генерал фон Эйхгорн азымахтап алған Минскте, 1918 чылның азығ айы

  • Германия империязының войсколары. Киев, 1918 чылның кӧрік айы

    Германия империязының войсколары. Киев, 1918 чылның кӧрік айы

  • Немец: «Россия пісті паарсах удурлапча» (Одесса журналының хозы, 1918 чылның кӧрік алай хосхар айы)

    Немец: «Россия пісті паарсах удурлапча» (Одесса журналының хозы, 1918 чылның кӧрік алай хосхар айы)

  • Чон комиссарлар чӧбінің «Социалистическай Ада чир хорғыста!»декреттіг чазыннары, 21 февраля 1918 года

    Чон комиссарлар чӧбінің «Социалистическай Ада чир хорғыста!»декреттіг чазыннары, 21 февраля 1918 года

23 февральда иртен герман курьері Совнаркомға ультиматум ағылған; сағынарға 48 час пирілген[12]. РСДРП(б) ЦК-ның чыылиинда Ленин, тоғыра полғаннары кӧп тее полған полза, ЦК-ның кізілерін ульматумны аларға чӧптеп алған. Ленин амыр чуртас чӧптезиин герман оңдайларында сурған. Аның сағызынаң, «пролетар ӱлгӱзінің халған олтырағын хайдағ даа хорадығлар кӱзінең артызары» ӧӧні полча[13][14][15]. В ночь на 24 февраля он был принят. Однако бои продолжались до подписания мирного договора 3 марта[7].

«Правда» газетада 28 февральда 1918 чылда чарыхха сыххан «Аар, че кирек урок» статьяда В. И. Ленин ол кӱннердегі киректерні піди чарытхан:

Полктарның пос позицияларын тударға итпинчеткенінеңер, Нарва линиязын даа хайраллирға ынабинчатханынаңар, нандыра пасчатса, прай нимені чох идерге чахығны толдырбинчатханнаңар иреелестіг-уйат искіріглер; тисчеткеннерінеңер, хаос полчатханынаңар, полызығ чохтарынаңар, ниме чарабаанынаңар чоох таа чоғыл (…) Совет республиказында армия чоғыл.

26 февральда РСФСР-ның Чон комиссарларының чӧбі ӱлгӱнің прай органнарын Москвазар кӧзірерінеңер чарадығ алған.

3 мартта 1918 чылда герман оңдайларында Бресттегі амыр чуртас чӧптезиинде хол салылған.

Московскай паза прай Россия Патриархы Тихон позының чахиинда 5 (18) мартта 1918 чылда Бресттегі амыр чуртас чӧптезиин хомайлаан: «Чарадыға килген амғы амыр чуртас, хайзының хоостыра пістің сын сабланыс киртіністіг чоннар чуртапчатхан областьтар алылып, піске пасха киртіністіг ыырҷыға пирілчелер, сын сабланыс киртіністіг онарлар миллион чон, тізең, илбек доховнай хығырығ оңдайларында оларның киртінізіне парчалар, … амыр чуртас, хайзы пістің чонны паза орыс чирін аар пазыға пирче, — андағ амыр чуртас чонға хынған тынағны паза амыр чуртасты пирбес. Сын киртіністіг тигірибге, тізең, улуғ ӱрег паза хыйал ағылар, Ада чир-суубысха — саны чох хорағлар»[16].

Улӱкӱннің тӧстелгені[тӱзедерге | код тӱзедерге]

10 январьда 1919 чылда Тоғысчы-кресеннернің Хызыл Армиязының Ӧӧркі чаа инспекциязының Кнезі Николай Подвойский ВЦИК-сар РККА-ның тӧстелген чылын 28 январьда таныхтирынаңар чӧпті ызыбысча:

28 январьда Чон комиссарлар чӧбі Тоғысчы-кресеннернің Хызыл Армиязын тӧстирінеңер декретті чарыхха сығарыбысханнаң пеер пір чыл толча. Хызыл армия тӧстелген кӱнні 28 январьда, декрет сыххан кӱнде, таныхтаан полза, чахсы поларҷых.

Аның айланызы орай килче паза 23 январьда ла кӧрілче. Іди орай килген чӧпті ВЦИК чаратпиныбысча. 24 январьда, тізең, Моссовет Президиумы «Хызыл армия тӧстелгеніне чарыдылған ӱлӱкӱнні тимнирінеңер» сурығны кӧрче паза аны 17 февральда таныхталчатхан Хызыл сыйых кӱнінең піріктірібісче. Хызыл сыйых кӱні полызығ чӧрімі чіли кӧрілген полған, ол кӱнде чон хызыл армеецтерні сыйыхтирға кирек полған. 17 февраль пас кӱнге киліс парған ӱчӱн, Хызыл сыйых кӱнін паза РККА-ның тӧстелген чылын иң чағын позырахха чылдырыбысханнар. Ол кӱн 23 февральға киліс парған. «Правда» газетада искірілген:

Хызыл сыйых кӱнін тиксі Россияда таныхтиры 23 февральға чылдырылча. Пу кӱнде прай городтарда паза фронтта Хызыл армияа 28 январьда тӧстелгенінең пеер пір чыл толғаны таныхталар.

Соонаң ӱлӱкӱн нинҷе-де чылға ундудыл парған, 1922 чылда айландырылған. Ол чылда 27 январьда ВЦИК Президиумының Хызыл армиязының 4 чылына чарадығ чарыхха сыххан, анда чоохталған[17]:

Тиксі Россиядағы Хызыл армиядаңар IX Советтер чыылии чарадии хоостыра, ВЦИК Президиумы Хызыл армияның тӧстелгенінең пеер чылы (23 февральда) чағдапчатханына исполкомның хайиин тартча.

Псковта Хызыл армияның тӧстелген чылына чарыдылған мероприятиелер афишазы, 23 февральда 1919 чылда[18].

23 февральда таныхтапчатхан сылтағлар[тӱзедерге | код тӱзедерге]

1923 чылда РККА-ның 5 чылы алғым таныхталған. 23 февральдағы ӱлӱкӱннер тиксі Союзтағы синге чит парғаннар. Рсепубликаның Реввоенсоведінің 5 февральда 1923 чылда Л. Д. Троцкий хол салған чахиинда ӱлӱкӱннің тӧстее полчатхан кирек піди таныхталча: «23 февральда 1918 чылда, ыырҷыларға хыстырып, тоғысчылар паза кресеннер правительствозы тирігліг кӱстер киректелчеткенін чарлабысхан»[9]. Олох чылда «Военная мысль и революция» журналда 23 февральда пастағы Хызыл армия частьы тӧстелгені, ол алтынзархы-кидеркі сариндағы чаалазығларда араласханы таныхталған.

1933 чылда К. Е. Ворошилов (Троцкийнің политика ыырҷызы) РККА-ның 15 чылына чарыдылған пайрамнығ чыылығда искірген[19]:

Олох туста чоохтаза, РККА-ның тӧстелген чылын 23 февральда таныхтиры пілдістіг нимес паза тархыннаң палғалыстығ нимес.

Сталин соондағы туста, тізең, генерал-майор профессор С. Ф. Найда 23 февральда В. И. Лениннің «Социалистическай Ада чирібіс хорғыста!» декредінің хығыртиина Петроградта Хызыл армия отрядтары тӧстел сыхханнар, ол Совет армиязының тӧстелгеніне чарыдылған ӱлӱкӱн тӧстее полча тіп таныхтаан[20].

Хазналардағы Ада чир-суғ арачылағҷызы кӱні

[тӱзедерге | код тӱзедерге]

Ада чир-суғ арачылағҷызы кӱні СССР-ға кірген нинҷе-де хазнада таныхталча.

23 февральда 1968 чылда СССР-ның Тирігліг кӱстерінің 50 чылына сығарылған СССР-ның почта маркалары.

Россиядағы Ада чир-суғ арачылағҷызы кӱні[тӱзедерге | код тӱзедерге]

Россия Федерациязының Ӧӧркі Чӧбінің арачыланыс паза хорғыс чох поларынҷа сурығларҷа Комитедінің пастаанаң ӱлӱкӱннің наа ады РФ-ның Ӧӧркі Чӧбінің Президиумының 08.02.1993 4423-1 N «Россия Федерациязының танығлығ кӱні — Ада чир-суғ арачылағҷызы кӱнін — тӧстирінеңер» Чарадиинаң кирілген.

2002 чылдаң сығара Россия Федерациязының Федеральнай чыылииның Хазна думазының чарадиинаң 23 февраль Россияда тоғыс нимес ӱлӱкӱнге саналча паза пу кӱн РФ-ның 13 мартта 1995 чылда алылған 32-ФЗ № «Россияның чааҷы сабланызы паза танығлығ кӱннерінеңер» Федеральнай законҷа «Ада чир-суғ арачылағҷызы кӱні» чіли таныхталча[21]. Ол законҷа, «Ада чир-суғ арачылағҷызы кӱні» Россия Федерациязында Россияның чааҷы сабланызы кӱні полча.

24 мартта 2006 чылда Хазна думазы законның ӱлӱкӱнні чарытчатхан «Хызыл Армияның Германияның кайзер войсколарын чиңіп алған кӱні (1918 чыл)» сӧстерні сығарыбызарға, ідӧк пу законда пу ӱлӱкӱннің адында «арачылағҷы» оңнағны пір санда пирерге (РФ-ның Істеніс кодекзінің 112 ст. пу ӱлукӱн адалған оңдайынҷа) чарадығ алған.

Совет тузы соондағы Россияда 23 февраль кӧп чон таныхтапчатхан ӱлӱкӱн полча, аны істеніс ӧмелері, школалар, сӧбірелер таныхтапчалар. Алынҷа алғыстатчаң кізілер сурии ам даа пір чӧптіг иде пӧгілгелек. Пар ӱс аймах кӧріс: чааҷылар (ир кізі алай ипчі пасхазы чоғыл) ла ӱлӱкӱні; армиянаң палғалыстығ, уламох Илбек Ада чаа ветераннары (ир кізі алай ипчі пасхазы чоғыл); Россиядағы прай ир кізілер, ол санда оолағастар, паза армиянаң палғалыстығ нимес ир кізілер[22].

Ада чир-суғ арачылағҷызы кӱні, Москва, Александровскай сад, 23 февральда 2008 чылда. Россия Президенті Владимир Путин Ады чох Чааҷы Сӧӧгіне чахайахтар салча

Москвадағы кибірлернің пірсі — Кремль стеналары хыринда пайрамни Ады чох Чааҷы Сӧӧгіне чахайахтар салары. Александровскай садсар Россия Президенті, Федеральнай чыылығның ікі палатазының пастары, чааҷылар устағ-пастаа, ӱлгӱнің пасха кізілері, политика партияларының пастары, тигіриб кізілері кил парадырлар[23]. Сым турған пағат соонаң хазна гимні ойналча, анаң аарластығ караул ротазы пайрамни хаалапча. Алынҷа мероприятиелерні политика партиялары иртірчелер[24]. Иирде хазнаның ӧӧркі устағ-пастаа Ада чир-суғ арачылағҷызы кӱніне чарыдылған пайрамнығ концертте полчалар. Ідӧк иирде Россияның кӧп хазналарында пайрамнығ салют иртірілче[25][26]. Псковта Ада-чир-суғ арачылағҷызына чарыдылған пайрамнығ концерт, ідӧк Хызыл Армияның пастағы чаалазығларына чарыдылған хумартхы тас хыринда парад иртче[27][28][29]. Парадтар пу кӱнде Россияның пасха городтарында иртчелер[30][31].1918 чылның азығ айында полған киректернің реконструкциялары кӧзіділчелер[32][33][34]. Севастопольда Ада чир-суғ арачылағҷызына паза 2014 чылда полған киректер хоостыра тӧстелген Чонның кӧңнінің кӱніне чарыдылған митинг иртче. Андада 23 февральда Севастопольның кінінде муңар кізі Россияа пірігер кӧңнілерін кӧзіткеннер[35][36][37].

23 февральда 1918 чылда Псков алтында полған чаалазығ реконструкциязының араласчылары. Псков, 23 февральда 2018 чылда

Россия кізілеріне Ада чир-суғ арачылағҷызы кӱні аарлығ паза танығлығ кӱн полча. 2013 чылның азығ айында ирткен «Общественное мнение» чыындының сурағлар салтары хоостыра, андағ нандырығ пиргеннер сурағ ирткеннернің 77 проценті[38].

23 февраль — Ада чир-суғ арачылағҷызы кӱні — ДНР-да паза ЛНР-да тынағ ӱлӱкӱн чіли чарлалғаннар[39][40][41][42][43].

Беларусь Республикадағы Ада чир-суғ арачылағҷызы паза Тирігліг кӱстер кӱні[тӱзедерге | код тӱзедерге]

Белоруссияда Тоғысчы-кресеннернің Хызыл Армиязы тӧстелгенінең сығара Беларусь Республиканың Тирігліг кӱстерінің тархыны пасталғаны чарыдылча.

Ол ниик нимес тархын тузы піске кӧп аймах чарыда чоохтар артыс пирген. Піс, тізең, ӧӧнін ундупасха кирекпіс: ол кізілер паза ол Хызыл армия піске чуртирға, нация поларға хабас пирген. Ол талас чох сын полча, аны піс хайраллирға паза пазағы тӧлге артыс саларға кирекпіс.

— Президент Республики Беларусь Александр Лукашенко[44]

Белорус паза Россия чааҷылары «Ада чир-суғ арачылағҷызына» чарыдылған хада-пірге пайрамнығ мероприятиелерні иртірчелер[45][46]. Белоруссияның Тирігліг кӱстерінің чӱс чылына чарыдылып, 2018 чылның 23 февральында Гроднода авиациялығ парад ирткен[47], ідӧк Минск город-матырда, Брест крепость-городта, Витебск, Гомель, Гродно паза Могилёв городтарда отыс атыстығ пайрамнығ салют ирткен[48][49].

Украинадағы 23 февраль[тӱзедерге | код тӱзедерге]

Украинада Украинаның Тирігліг кӱстерінің кӱні 6 декабрьда таныхталча. Аны пірдеезі дее таныхтабинчатханда (чааҷылар частьтары паза корабльлар пайрамни турғысхлалбааннар, парадтар иртпееннер паза пасха оңдайнаң пайрамналбааннар, пу кӱнде теестегі званиелер пирілбеен ӱчӱн паза пасх.), иргі оңдайнаң 23 февральда таныхтирынаң пірдеезі тоғыр полбаанда, 1999 чылда президент Леонид Кучманың сығарылған чахиинаң, 23 февраль закон хоостыра Ада чир-суғ арачылағҷызы чіли кирілген. 6 декабрь чіли ол танығ кӱні полбаан.

2008 чылда Украина президенті Виктор Ющенко «Ада чир-суғ арачылағҷызының сын национальнай кӱнін» 29 январьны — «Крут матырларының махачызы кӱні» — тіп адабысхан паза закон оңдайынҷа пу танығлығ кӱнні тӧстирінеңер пастағны чарат салған (2008 чылның кӱрген айында Черкасскай областьтың Украина чон партиязы пірігізі президентке Ада чир-суғ арачылағҷызы кӱнін 23 февральдаң 29 январьға чылдырыбызарға чӧпнең айланған)[50]. 23 февраль тоғыс кӱні дее полза, «Ада чир-суғ арачылағҷызы» чіли алғым таныхталған.

2013 чылда «Рейтинг» социология группазы 23 февраль ӱлӱкӱніне чон кӧрчеткені хоостыра сурағ иртірібіскен. Сурағ ирткеннернің 41 % 23 февраль чағын иреннерге чахсы ниме идер сылтағ полған тіп таныхтааннар (кӧп сабазын ипчілернің кӧрізі). Чонның 39 % аны армияа теелчеткен ир кізілернің ӱлӱкӱніне санааннар (іди кӧп сабазын постары ир кізілернің кӧрізі). 12 % аны ирт парған совет тузының политика ӱлӱкӱні чіли санааннар, 7 % — олаңай кӱнге. Істезігнің салтарынҷа, Украинаның чуртағҷыларының кӧп сабазы 23 февральны ӱлӱкӱн чіли кӧргеннер[51].

14 октябрьда 2014 чылда Украина президенті Пётр Порошенко Украинадағы Ада чир-суғ арачылағҷызы кӱнін таныхтабысхан[52]. 23 февраль орнына 14 октябрьда наа ӱлӱкӱн, Украина арачылағҷызы кӱні, тӧстелген. Соонаң ол Украинаның ир кізі арачылағҷылары паза ипчілер арачылағҷылары кӱні адал парған[53]. 14 октябрьда тигіриб Ах-арығ Богородицаның покровы таныхталча, украин националисттері, тізең, Украинаның повстанецтер армиязының тӧстелген чылының кӱнін таныхтапчалар[54].

Киргизиядағы Ада чир-суғ арачылағҷызы кӱні[тӱзедерге | код тӱзедерге]

Киргизияда Кыргызстанның Тирігліг кӱстерінің кӱнін таныхтирына тимненіс тузы. Бишкек, 2018 чылның сілкер айы.

Киргизияда Ада чир-суғ арачылағҷызы кӱні чыл сай 23 февральда таныхталча. Ол тоғыс нимес ӱлӱкӱн кӱні полча. 2004 чылда алылған (113 ст.) Киргизия Республиканың Істеніс кодекзі хоостыра, Кыргызстанның Тирігліг Кӱстерінің кӱні 29 майда таныхталча, тоғыс кӱні полча.

Бишкекте пу кӱнде мэрия алнындағы ачыхта Бишкектің гарнизонының чааҷылары пайрамни турыбысчалар, анаң чааҷылар оркестр ойыны хоостыра столицаның «Ала-Тоо» ӧӧн ачығынзар параднаң хаалапчалар[55][56].

Казахстандағы Ада чир-суғ арачылағҷызы кӱні[тӱзедерге | код тӱзедерге]

Казахстанда Ада чир-суғ арачылағҷызы кӱні 7 майда таныхталча. 1992 чылның сілкер айының 7-ҷі кӱнінде Казахстан президенті (Ӧӧркі главнокомандующай полған) Нурсултан Назарбаев национальнай Тирігліг кӱстерні тӧстирінеңер чахығда хол салыбысхан.

23 февраль Казахстанда пічік хоостыра ӱлӱкӱнге саналбинча, че пу кӱнде ипчілер иреннерні алғыстапчалар паза сыйыхтар читірчелер[57].

Ада чир-суғ арачылағҷызы кӱні паза Таджикистанның Тирігліг кӱстерінің тӧстелген кӱні[тӱзедерге | код тӱзедерге]

Таджикистандағы «Ада чир-суғ арачылағҷызы кӱніне» тимненіс. Душанбе, 13 февральда 2018 чылда.

Таджикистанда 23 февральда Ада чир-суғ арачылағҷызы паза Таджикистанның Тирігліг кӱстерінің тӧстелген кӱні таныхталча[58].

1992 чылның кӱрген айында Таджикистан Президентінің Чахиинаң Таджикистан Республиканың Арачыланыс комитеді тӧстелген, аның холына хазнаның чирлерінде турчатхан частьтар паза соединениелер, военкоматтар, штабтар, гражданскай арачыланыс учреждениелері паза формированиелері, вузтарның чаа кафедралары, чаа-юридическай органнар, обеспечение паза обслуживание частьтары кіргеннер. Национальнай гвардия тӧстел сыххан. 18 декабрьда 1992 чылда ТР-ның Ӧӧркі Чӧбінің Президиумының чахиинаң Таджикистанның Арачыланыс министерствозы тӧстелген. Пастағы подразделениелер, частьтар Чон фронтының отрядтарынаң тӧстелгеннер.

23 февральда 1993 чылда СССР изел парған соонаң, гражданскай чаа тузында пастағызын Тирігліг кӱстернің чаа парады ирткен. 23 февраль тархынҷа Тирігліг кӱстернің кӱні чіли таныхталған сылтаанда, пу кӱнні Таджикистанның Тирігліг кӱстерінің тӧстелген кӱні тіп чарлабызарға чарадығ алылған[59].

Ӱстӱнзархы Осетиядағы Ада чир-суғ арачылағҷызы кӱні[тӱзедерге | код тӱзедерге]

23 февраль Ӱстӱнзархы Осетияда пічік хоостыра ӱлӱкӱнге паза тоғыс кӱніне саналча. 23 февральда хазнанын устағ-пастаа паза чоны Илбек Ада чаа тузында Совет Армиязында служба апарған ветераннарны паза 90 чылларда Ӱстӱнзархы Осетияны арачылаан паза ол тоғысты узаратчатхан кізілерні аарлап-чеестепчелер. Арачыланыс министерствозының, ОМОН-ның пасха подразделениелернің чааҷыларын паза МВД тоғынҷыларын чеестепчелер. Неделя тооза тиксі Ӱстӱнзархы Осетияҷа хумартхы иирлер паза арачылағҷыларнаң тоғазығлар иртчелер[60].

23 февраль Абхазияда[тӱзедерге | код тӱзедерге]

23 февральда Абхазияда таныхталча, че ӱлӱкӱнге саналбинча. Пу кӱнде Абхазия Республиканың Арачыланыс министерствозының чааҷылары Абхазияда турчатхан Россиядағы 7-ҷі чаа базазынаң паза АР-дағы РФ ФСБ-ның Пограничнай устанызының хырығҷыларынаң хада-пірге Сухумдағы Махаджиров набережнайында Ады чох чааҷы хумартхы тазына чахайахтар салчалар. Ідӧк 1992—1993 чч Адалығ чаада чат халған Абхазия чонына паза Грузия-Абхазия талазы чирінде, служба иртіп, тыннарын пир салған Россия миротворецтеріне чахайахтар салылчалар. Абхазия паза Россия чааҷылары ӱреен миротворецтерге чахайахтарны Сабланыс паркындағы хумартхы тассар салчалар[61].

23 февраль Арменияда[тӱзедерге | код тӱзедерге]

Арменияда пу кӱн хазна ӱлӱкӱніне саналбинча. Ереванда паза Гюмриде, тізең, 23 февральда Ада чир-суғ арачылағҷылары кӱніне чарыдылған мероприятиелер пайрамни иртчелер. Арменияның Арачыланыс министрі, Тирігліг кӱстернің Ӧӧн штабының пастығы, РФ-ның Армениядағы сағыбаан паза киртістіг илҷізі, Арменияның паза Россияның Тирігліг кӱстерінің пӧзік аттығ офицерлері паза чааҷылары, дипломатия ведомстволарының кізілері Еревандағы Чиңіс паркындағы Ады чох Чааҷы хумартхы тазына чахайахтар салчалар. Іди Ада чир-суун арачылап, тыннарын пир салған кізілерні аарлапчалар. Анаң Армения паза Россия чааҷылары параднаң паркча иртчелер.

Гюмри городта «Дом Москвы» культура-тоғыс кіні Москвадағы тастындағы экономика паза чоннар аразындағы правительство палғалыстары департаментінің хабазиинаң 23 февральға чаа паза чир-сууна хынҷаң сарыннарның улуғ концертін иртірче, анда саблығ армян ырҷылары паза музыканттары араласчалар. Городтың драма театрында орындағы чуртағҷылар, Россияның 102-ҷі чаа базазының чааҷылары чыылысчалар[62].

23 февраль Латвияда[тӱзедерге | код тӱзедерге]

Латвияның пос полыбысханы чарлал парғанда, 23 февраль пічік хоостыра ӱлӱкӱн полбиныбысхан[63]. Латвияда чуртапчатхан Илбек Ада чаа араласчылары, СССР-ның Тирігліг кӱстерінің чааҷылары полған кізілер, тирігліг таластар араласчылары, совет чаа пӧзік ӱгредіг заведениелерін тоосханнары таныхтапчалар. Даугавпилсте пу кӱнде кибірли Дубровиннің паркындағы хумартхы таста город чуртағҷылары город ӱчӱн чааласхан чааҷыларны сағысха кирчелер. Ригада 23 февральда Латвияның паза Пардаугаведегі Риганың Позыдығҷыларының хумартхы тазына чахайахтар салылчалар[64].

23 февраль Эстонияда[тӱзедерге | код тӱзедерге]

Пу кӱнде Россия Федерациязының паза Беларусь Республиканың Эстониядағы Посольстволар тоғынҷылары, Эстонияның ветераннар паза халых пірігістерінің кізілері Таллиндегі Чааҷылар сыырадындағы Чааҷы-позыдығҷы хумартхы тастың тӧзіне чахайахтар салчалар[65][66][67][68].

Приднестровье Молдавия Республикадағы Ада чир-суғ арачылағҷызы кӱні[тӱзедерге | код тӱзедерге]

Приднестровьеде Ада чир-суғ арачылағҷызы кӱні хазна синіндегі ӱлӱкӱн полча, ол 23 февральда таныхталча. Ӱлӱкӱннің ӧӧн чардығы Тираспольда иртче. Анда президент паза кӱс ведомстволарының пастары араласчалар[69].

Алған орын

[тӱзедерге | код тӱзедерге]
  1. ↑ День защитников Отечества. Дата обращения: 18 Хандых айы 2022.
  2. ↑ Поздравление Владимира Путина по случаю Дня защитника Отечества. news.1777 (23 Азығ айы 2024). Дата обращения: 10 Хандых айы 2024.
  3. ↑ Константин Медведев. 23 февраля - День защитника Отечества. Чем важен этот праздник для нас? Российское историческое общество. Дата обращения: 17 Кӱрген айы 2025.
  4. ↑ Газета Временного рабочего и крестьянского правительства. — 20 января (2 февраля) 1918. — № 13 (58). — С. 1.
  5. ↑ Черепанов А. И. «Под Псковом и Нарвой». — М. : Воениздат, 1956. — С. 18.
  6. ↑ Ганин А. В. И. Г. Пехливанов — один из первых историографов Первой балканской войны. Архивная копия от 19 Кӧрік айы 2015 на Wayback Machine // promacedonia.org
  7. ↑ 1 2 3 Николаев П. А. Интервенция Германии // Интервенция на Северо-Западе России 1917—1920 гг. — Российская академия наук, Институт российской истории, Санкт-Петербургский филиал. — СПб.: «Наука», 1995. — С. 93—99.
  8. ↑ Черепанов А. И. Под Псковом и Нарвой. — М. : «Воениздат», 1956. — С. 71.
  9. ↑ 1 2 Гривенко В. Историческое переосмысление 23 февраля Архивная копия от 19 Азығ айы 2007 на Wayback Machine // Независимое военное обозрение : интернет-газета // nvo.ng.ru (16 февраля 2007 года)
  10. ↑ 1 2 Газета Временного рабочего и крестьянского правительства, № 31 (76) от 23 февраля 1918 года, с. 1.
  11. ↑ 1 2 Кораблёв Ю. Защита Республики. Как создавалась Рабоче-крестьянская Красная армия. // Переписка на исторические темы: диалог ведёт читатель. — М.: Политиздат, 1989. — С. 160—161.
  12. ↑ Kotkin, 2014, с. 256.
  13. ↑ Барсенков А. С., Вдовин А. И. История России. 1917—2004 гг. : учеб. пос. для вузов. — М., 2005. — С. 62.
  14. ↑ Ленин В. И. Мир или война (напечатано 23 февраля 1918 г.) // Полн. собр. соч. — Т. 35. — С. 368.
  15. ↑ Войтиков С. С. Развитие взглядов высшего руководства Советской России на военное строительство в ноябре 1917 — марте 1918 г. // Вопросы истории : журнал. — № 10. — 2007.
  16. ↑ Послание Патриарха Московского и всея России Тихона по поводу заключения Брестского мира. 5 (18) марта 1918 года.
  17. ↑ Историческая справка о дне 23 февраля. Архивная копия от 25 Кӱрген айы 2020 на Wayback Machine // happy-year.narod.ru
  18. ↑ С историей формирования Красной армии можно ознакомиться на выставке в Пскове. Архивная копия от 14 Хосхар айы 2021 на Wayback Machine // pln-pskov.ru
  19. ↑ Максим Хрусталёв. «Несокрушимая и легендарная». — Исторические корни Дня защитника Отечества. Архивная копия от 7 Орғах айы 2017 на Wayback Machine // km.ru (23 февраля 2010 года)
  20. ↑ Найда С. Ф. Почему день Советской армии и Военно-морского флота празднуется 23 февраля? // Военно-исторический журнал. — 1964. — № 5. — С.115—117.
  21. ↑ Федеральный закон Российской Федерации № 32-ФЗ от 13 марта 1995 года «О днях воинской славы (победных днях) России». Архивная копия от 26 Кічіг хырлас айы 2021 на Wayback Machine Официальный сайт Президента Российской Федерации // kremlin.ru
  22. ↑ Кого нужно поздравлять 23 февраля? Аргументы и факты (22 Азығ айы 2017). Дата обращения: 21 Азығ айы 2019. Архивировано 22 Азығ айы 2019 года.
  23. ↑ В День защитника Отечества Святейший Патриарх Кирилл возложил венок к могиле Неизвестного солдата у Кремлёвской стены. Дата обращения: 23 Азығ айы 2016. Архивировано 6 Кӧрік айы 2016 года.
  24. ↑ 23 февраля 2018 года. Москва. Шествие КПРФ. Дата обращения: 27 Азығ айы 2018. Архивировано 14 Хосхар айы 2019 года.
  25. ↑ Полная программа мероприятий на 23 февраля в Волгограде. Дата обращения: 1 Сілкер айы 2020. Архивировано 25 Азығ айы 2018 года.
  26. ↑ Москва отметила День защитника Отечества красочным салютом
  27. ↑ В Пскове состоялся торжественный концерт, приуроченный к 100-летию Красной армии и Дню защитника Отечества. Дата обращения: 22 Азығ айы 2018. Архивировано 22 Азығ айы 2018 года.
  28. ↑ 23 февраля 2016 года на площади у стелы в Крестах состоялся парад войск в честь Дня защитника Отечества. Дата обращения: 1 Сілкер айы 2020. Архивировано 19 Хосхар айы 2021 года.
  29. ↑ Парад в Крестах 23 февраля 2017 года. Дата обращения: 23 Азығ айы 2017. Архивировано 24 Азығ айы 2017 года.
  30. ↑ Парад в День защитника Отечества в Омске. Дата обращения: 23 Азығ айы 2019. Архивировано 23 Азығ айы 2019 года.
  31. ↑ Парад в Североморске в честь 100-летия РККА. Дата обращения: 23 Азығ айы 2019. Архивировано 21 Азығ айы 2022 года.
  32. ↑ В воскресенье во Всеволожске восстановили события февраля 1918 года, происходившие под Псковом. Дата обращения: 29 Азығ айы 2016. Архивировано 4 Кӧрік айы 2016 года.
  33. ↑ Масштабная историческая реконструкция к столетию образования РККА состоялась в Пскове (ВИДЕО). Дата обращения: 1 Сілкер айы 2020. Архивировано 19 Хосхар айы 2021 года.
  34. ↑ Празднование Дня защитника Отечества в Псковской области. Дата обращения: 27 Азығ айы 2018. Архивировано 21 Азығ айы 2022 года.
  35. ↑ На митинге в Севастополе без единого украинского флага выбрали нового мэра, гражданина РФ - СМИ. Интерфакс-Украина. Дата обращения: 21 Азығ айы 2019. Архивировано 22 Азығ айы 2019 года.
  36. ↑ Двойной праздник: в Севастополе отметили 23 Февраля и День народной воли. Дата обращения: 27 Азығ айы 2018. Архивировано 27 Азығ айы 2018 года.
  37. ↑ Выпуск «Севинформбюро» от 23 февраля 2018 года
  38. ↑ О российской армии и 23 февраля. Дата обращения: 1 Сілкер айы 2020. Архивировано 23 Хосхар айы 2021 года.
  39. ↑ День защитника Отечества 2018 в Донецке. Дата обращения: 23 Азығ айы 2018. Архивировано 24 Азығ айы 2018 года.
  40. ↑ Митинг по случаю празднования 100-летия со дня основания Красной армии прошёл в Луганске. Дата обращения: 23 Азығ айы 2018. Архивировано 24 Азығ айы 2018 года.
  41. ↑ Глава ДНР объявил 23 февраля выходным днём. Дата обращения: 22 Азығ айы 2016. Архивировано 3 Кӧрік айы 2016 года.
  42. ↑ В ЛНР подписан указ о праздновании 23 февраля. Дата обращения: 1 Сілкер айы 2020. Архивировано 8 Орғах айы 2020 года.
  43. ↑ ЛНР отметила День защитника Отечества награждением отличившихся, митингами и салютом (ФОТО). Дата обращения: 25 Азығ айы 2018. Архивировано 25 Азығ айы 2018 года.
  44. ↑ Александр Лукашенко принял участие в торжественном собрании, посвящённом 100-летию Вооружённых Сил Беларуси. Архивная копия от 24 Азығ айы 2018 на Wayback Machine Национальный центр правовой информации Республики Беларусь // pravo.by (23 февраля 2018 года)
  45. ↑ Российские и белорусские десантники на лыжах отметили 100-летие Красной армии. Архивная копия от 22 Азығ айы 2018 на Wayback Machine Телеканал «РЕН ТВ» // ren.tv (22 февраля 2018 года)
  46. ↑ Ярослав Мирнов. В Пскове прошёл парад, посвящённый Дню защитника Отечества. — Участниками марша стали десантники из Пскова и Белоруссии, лётчики, спецназовцы и сотрудники УФСИН. Архивная копия от 25 Азығ айы 2018 на Wayback Machine Газета «Комсомольская правда» (Псков) // pskov.kp.ru
  47. ↑ ВИДЕО. Военный парад к 100-летию Вооружённых Сил Республики Беларусь. Гродно, 23 февраля 2018 года. Архивная копия от 29 Орғах айы 2020 на Wayback Machine // youtube.com (пользователь — «Телеканал Гродно Плюс»; опубликовано 24 февраля 2018 года)
  48. ↑ Военный парад в Гродно прошёл с участием авиации. Архивная копия от 24 Азығ айы 2018 на Wayback Machine «Белорусское телеграфное агентство» (БЕЛТА) // belta.by (24 февраля 2018 года)
  49. ↑ Приказ министра обороны Республики Беларусь от 7 февраля 2018 года № 170 «О праздновании Дня защитников Отечества и 100‑летнего юбилея Вооружённых Сил Республики Беларусь». Архивная копия от 24 Азығ айы 2018 на Wayback Machine Белорусская военная газета «Во славу Родины» // vsr.mil.by (23 февраля 2018 года)
  50. ↑ Что же мы отпраздновали 23 февраля? Салідарнасць. Дата обращения: 23 Азығ айы 2014. Архивировано 26 Азығ айы 2014 года.
  51. ↑ Фоторепортаж День защитников Отечества. Дата обращения: 28 Кӧрік айы 2013. Архивировано 2 Кӧрік айы 2013 года.
  52. ↑ Указ Президента України № 806/2014 — Офіційне представництво Президента України. Дата обращения: 31 Орғах айы 2016. Архивировано 14 Ӱртӱн айы 2016 года.
  53. ↑ Гендерна рівність: Рада перейменувала День захисника України. suspilne.media. Дата обращения: 14 липень 2021. Архивировано 14 От айы 2021 года. (укр.)}
  54. ↑ День защитника Украины теперь будет ежегодно отмечаться 14 октября. Дата обращения: 1 Сілкер айы 2020. Архивировано 19 От айы 2020 года.
  55. ↑ Военный парад прошёл в Киргизии в День защитника Отечества. Архивная копия от 31 Улуғ хырлас айы 2013 на Wayback Machine РИА «Новости» // ria.ru (23 февраля 2012 года)
  56. ↑ В центре Бишкека военные устроили марш по случаю 23 февраля (видео). // mir24.tv (23 февраля 2013 года) Архивная копия от 30 Улуғ хырлас айы 2013 на Wayback Machine
  57. ↑ 23 февраля или 7 мая? Информационная система ПАРАГРАФ. Дата обращения: 28 Кӱрген айы 2022. Архивировано 28 Кӱрген айы 2022 года.
  58. ↑ Парад в Душанбе 23 февраля 2013 года (видео) Архивная копия от 30 Улуғ хырлас айы 2013 на Wayback Machine
  59. ↑ 23 февраля — День защитника и День образования Вооружённых Сил Таджикистана Архивная копия от 31 Улуғ хырлас айы 2013 на Wayback Machine
  60. ↑ 23 февраля в странах СНГ. Дата обращения: 28 Кӧрік айы 2013. Архивировано из оригинала 29 Чарыс айы 2012 года.
  61. ↑ 23 февраля — День защитника Отечества в Абхазии Архивная копия от 30 Улуғ хырлас айы 2013 на Wayback Machine
  62. ↑ День защитника Отечества отметили в Армении. Дата обращения: 29 Кӧрік айы 2013. Архивировано 1 Кӧрік айы 2013 года.
  63. ↑ 23 февраля в Латвии: не «День защитника отечества», но «Мужской день» и для многих — праздник. Дата обращения: 24 Азығ айы 2018. Архивировано 24 Азығ айы 2018 года.
  64. ↑ В Риге отметили 23 февраля. Дата обращения: 26 Кӧрік айы 2013. Архивировано 30 Хосхар айы 2012 года.
  65. ↑ 23 февраля: День защитника Отечества на Воинском кладбище в Таллине. Дата обращения: 1 Сілкер айы 2020. Архивировано 9 Ӱртӱн айы 2018 года.
  66. ↑ В Таллине отметили День защитника Отечества (видео). Дата обращения: 8 Кӧрік айы 2015. Архивировано 27 Азығ айы 2015 года.
  67. ↑ В Эстонии решили игнорировать запрет на празднование 23 февраля. Дата обращения: 1 Сілкер айы 2020. Архивировано 18 Хосхар айы 2021 года.
  68. ↑ На заводе Ericsson отметили День защитника Отечества: руководство начало внутреннее расследование. Дата обращения: 8 Кӧрік айы 2015. Архивировано 4 Кӧрік айы 2015 года.
  69. ↑ Военно-спортивный праздник, посвящённый Дню защитника Отечества — 23/02/18. Дата обращения: 27 Азығ айы 2018. Архивировано 11 Орғах айы 2020 года.

Ссылкалар

[тӱзедерге | код тӱзедерге]
Алған орны - https://kjh.ruwiki.ru/w/index.php?title=Ада_чир-суғ_арачылағҷызы_кӱні&oldid=82985