Хакас чирі (газета)
| «Хакас чирі» | |
|---|---|
 | |
| Тип | халых-политика |
| Ӧӧн редактор | Сунчугашев Радион Дмитриевич |
| Тӧстелген | 1927 |
| Тіл | хакас, орыс |
| Ӧӧн офис | Ағбан, Щетинкиннің ор, 34 |
| Тираж | 1,5 муң |
| Сыйыхтар |
 |
| Веб-сайт | khakaschiry.ru |
Хакас чирі — Хакасияда республика синінде хакас тілінең сыхчатхан халых-политика газетазы. Аның тӧстегҷілері Хакас Республиканың Правительствозы паза Хакасияның Ӧӧркі Чӧбі полча. 1927 чылдаң сығара чарыхха сыхча.
Тиксі искіріг
Хакасияның халых-политика изданиезі регионның тиксі город-аймахтарынҷа тарадылча. Газетада хабарлар, экономика паза политика сурығлары[1], интервьюлар, Хакас Республиканың законнары паза пасха право акттары[2] чарых кӧрчелер, хакас чонның тархынына паза культуразына чарыдылған материаллар чарыдылчалар.
Газета 8-16 полосада неделяда 2 хати чарыхха сыхча. Аның хоза тӧрт сығарызы пар: «Таң солбаны» — литература страницазы, «Чиит тус» чииттерге кӧріл парған приложение, «Хола пырғыҷах» — чииттерге, «Ноға-ногачахтар» — кічіг хығырығҷыларға. Тираж — 2025 чылда 1,5 муң экземпляр (1970 чылларда — 6 муң). Аның алнында айда ікі хати «Страна Хабар» орыс приложениезі чарыхха сыххан[3].
2015 чылның хандых айының 1-ғы кӱнінде газетаның пастағы сайты тоғын сыххан. Ол хабарлар таратчаң пірігістер аразында пӱкӱлеезінең хакас тілінең сығарылчатхан чалғыс сайт полча[1].
Тархын
Газета 1927 чылнын хандых айының 1-ғы кӱнінең сығара чарыхха сығарылча[3]. Пастап «Хызыл аал» адалған, 1930 чылға теере Минсуғдағы «Власть труда» орыс тілі газетазының хойнында пис кӱн пазынаң сыхчаң. Хакас Республиканың Национальнай архивінің танығларынаң, газетаның пастағы редакторы Иван Иванович Коков полған[4]. 1932 чылда пос типографиязы пол килгенде, «Хызыл аал» пос алынҷа газета полыбысхан паза Ағбан пилтірі аалда чарыхха сығарыл сыххан[4].
1927 чылдаң сығара 1929 чылға теере издание кириллицанаң пазылған, 1929 чылдаң сығара 1939 чылға теере — латиницада паза наа тӱрк алфавидінде, 1939 чылның кӧрік айының 3-ҷі кӱнінең сығара кириллицаа тӧстенген хакас алфавидінең пазыл сыххан.
1939 чылдаң сығара 1974 чылға теере, аразында тынанып, газетаның ӧӧн редакторы пастағы хакас профессиональнай хабарҷы С. К. Добров полған. 1959 чылдаң сығара газета «Ленин чолы» адалған сыххан[5], 1991 чылдаң сығара — «Хакас чирі», 2008 чылдаң сығара — «Хабар», 2020 чылдаң сығара — хатап «Хакас чирі»[6].
Газетаның тилізіне алынҷа хозым иткеннер: И. М. Костяков, М. Р. Баинов, В. Г. Майнашев, К. Т. Нербышев, В. К. Татарова, О. П. Шулбаев паза пасхазы. Издание редакциязында А. Е. Султреков, Топоев Илья Прокопьевич писательлер тоғынчалар.
Ӧӧн редакторлар
- Иван Коков (1927);
- Михаил Спирин (1927—1932);
- Николай Конгаров (1932—1935);
- Сидор Майнашев (1935—1938);
- Иван Спирин (1938—1939);
- Семён Добров (1939 — тынанып ‒ 1974 чылға теере)
- Серафима Арыштаева (1943—1946);
- Тимофей Балтыжаков (1946—1948);
- Парфирий Коков (1948—1950);
- Агафон Болганов (1950—1951);
- Елена Абдина (1954—1960);
- Георгий Сунчугашев (1974—1982);
- Гавриил Котожеков (1982—1996);
- Анатолий Угдыжеков (1996—2006);
- Максим Чаптыков (2006—2014);
- Радион Сунчугашев (2014 амғы тусха теере)[7].
Сыйыхтар
1977 чылда газета «Аарлас Тании» орденнең сыйыхтатхан[3].
Алған орын
- ↑ 1 2 «Хакас чирi»: в пяти шагах от столетия (2 Хандых айы 2022).
- ↑ Официальные издания. Гарант. Дата обращения: 16 От айы 2025.
- ↑ 1 2 3 Верховный совет Хакасии. Дата обращения: 16 От айы 2025. Архивировано из оригинала 1 Хандых айы 2013 года.
- ↑ 1 2 «Газета — летописец местной жизни», посвященная 95-летию республиканской газеты «Хакас чирi». Национальный архив РХ. Дата обращения: 16 От айы 2025.
- ↑ постановление о переименовании газеты «Хызыл аал» («Красное деревня») в «Ленин чолы» («Ленинский путь»). Национальный архив Республики Хакасия. Дата обращения: 16 От айы 2025.
- ↑ Единственной газете на хакасском языке вернули прежнее название. Дата обращения: 16 Кӧрік айы 2020. Архивировано 13 Азығ айы 2021 года.
- ↑ «Хакас чирi», хакасская республиканская газета на хакасском языке (к 95-летию со дня выхода первого номера). Национальная библиотека им. Н. Г. Доможакова. Дата обращения: 16 От айы 2025.