Хайҷы
Хайҷы — хакас нымахчы, хакас кӧг тиріглері — чатхан алай хомыс — пастыра алыптығ нымахтарны ысчатхан ус; чатханнаң алай хомыснаң ойнап, чон ырларын хайлап толдырчатхан музыкант.
Хайҷы — алыптың нымахты ысчатхан ус, ӧӧнінде ир кізі. Ипчілерге хайлирға чарадылбаҷаң. Хайлаҷаң оңдай тӧлдең тӧлге парҷаң, хакас чонында — улуғ аарласта. Алыптығ нымахта чонның тархыны читірілче.
Полған на профессиональнай хайҷының репертуарына 10—20 паза аннаң даа кӧп произведение кірҷең. Андағ кізілер санына артых чайалған кізілер, сағыста кӧп ниме тут полчатхан, ізепчілер санына кірчеткен, пасха сӧснең «сизіктіглер, ухаанҷылар» кірчелер. Сойан-Алтай тӱрктері аразында постарын алыптығ нымахха чарыт салған хайҷылар часка ӱлӱзі чох полғаннар. Олар удаа сӧбіре, чурты, ис-пайы чох халҷаңнар. Чон хайҷыларны улуғлаҷаң паза аарлаҷаң, ааллап удаа хығырҷаң. Улуғ пайлар аалларында оларнын чуртазын сабға сығарчатхан паза ӱтертчеткен нымахчыларны тутчаңнар.
Артых чайалған нымахчылар «ээліг хайҷы» тіп адалҷаңнар. Олар алыптығ нымахты ысчатса, оларны тағ, суғ, тайға ээлері изерге килҷең полчаатыр.
Чонда сабланған нымахчылар полғаннар С. П. Кадышев, П. В. Курбижеков, М. К. Добров, П. В. Тоданов, П. Н. Аргудаев паза пасхазы. С. П. Кадышев]] паза М. К. Добров СССР-ның Писательлер пірігізінің кізілері полғаннар.
Хайзы ученайларның кӧрізінең, саблығ хайҷы-нымахчылар ӱреен соонда, «чииттер тӧлі чонның хайлаҷаң кибірін апарбин сыхханда, анзы чох пол парған»[1]. Пу кӧріс хоостыра таластар учурапча.
Амғы туста хайлапчатхан музыканттарның узы пӧзік паалалча. Оларның санында [[Хакас Республика|Хакас Республиканың] саблығ артисттері Е. Улугбашев, В. Кученов, С. Чарков паза пасхазы.
2022 чылның кічіг хырлас айының 2-ҷі кӱнінде Хакас Республиканың чон хайҷызы паза Хакас Республиканың ил нымахчызы аарластығ аттар кирілгеннер[2].
2023 чылның кӱрген айының 1-ғы кӱнінең сығара Хакас Республиканың чон хайҷызы паза Хакас Республиканың ил нымахчызы аарластығ аттарға турысханнарға окладха хоза 15 % ахча полызии тӧлел сыххан[3].
Алған орын
- ↑ В. Я. Бутанаев, И. И. Бутанаева. Мир хонгорского (хакасского) фольклора. — Абакан: Издательство Хакасского государственного университета им. Н. Ф. Катанова, 2008, с. 9; «Петр Аргудаев был последним хайджи в традиционном представлении в нашей республике» — В. Н. Тугужекова. К истории изучения музыкальной культуры хакасов / «Чатхан: история и современность». Материалы II Международного симпозиума. Абакан, 2005, с. 16.
- ↑ О внесении изменений в отдельные законодательные акты Республики Хакасия в сфере государственных наград Республики Хакасия
- ↑ Верховный Совет установил доплату к почетному званию. vskhakasia.ru. Дата обращения: 23 Хосхар айы 2025.
Литература
- Кенель А. Семен Кадышев. — М.: Сов. композитор, 1962. — 30 с.
- Хайджи хакасского народа // Орджоникидзевский рабочий. — 1972. — 29 февр.
- В. Е. Майнагашева. Хайджи. Хайджи-нымахчи — Энциклопедия Республики Хакасия. Т. 2, Красноярск, 2008.
- В. Я. Бутанаев, И. И. Бутанаева. Мир хонгорского (хакасского) фольклора. — Абакан: Издательство Хакасского государственного университета им. Н. Ф. Катанова, 2008.