Тӧрт хоных

Худай чир ӱстӱн пӱдіргенінің, хустар паза палыхтар пол килгенінің тӧртінҷі кӱні («тӧрт хоных») (Бытие. 1:20-23).Нюрнберг хрониказы, 1493 ч.

Тӧрт хоных (орыс. Четве́рг) — саарсых кӱн паза пис хоных аразындағы кӱн. Тоғынчатхан чоннар аразындағы ISO 8601 стандартча пастағы тоғыс кӱні.

Сӧстің сыхханы

Орыс тіліндегі ат «четыре» сӧстең сыххан, ол неделяның тӧртінҷі кӱні полча. Андағох оңдайнаң пу кӱн ады пасха славян тіллерінде (словак — štvrtok, чех — čtvrtek, хорват паза босния — četvrtak, поляк — czwartek, болгар — четвъртък, серб — четвртак, украин — четвер, белорус — чацвер) учурапча.

«Тӧрт хоных» япон тілінде «ағас кӱні» (木曜日) полча.

Тӧрт хоныхтың мӱчелдегі орны

«Тӧрт хоных (таңда пис хоных)», Садлер, 1880 ч.

ISO 8601 хоостыра тӧрт хоных неделяның тӧртінҷі кӱні полча. «Тӧртінҷі» (星期四) тіп хыдат паза эстон тіллерінде (neljapäev) тузаланылча.

Иудей паза христиан кибірлерінде тӧрт хоных кибірли неделяның пизінҷі кӱніне саналча. Іди грек тілінде: Πέμπτη («пемпти») — «пизінҷі», ивритте: יום חמישי («Йом Хамиши» — «Пизінҷі Кӱн»). Ідӧк португал тілінде, «литургия неделязының пизінҷі кӱні» таныхтапчатхан quinta-feira сӧс тузаланылча.

«Пизінҷі кӱні» тіп тӧрт хоных исланд, араб паза индонезия тіллерінде адалча.

Армян (Հինգշաբթի — hингшабти́), грузин (ხუთშაბათი — хутшабати), башкир (кесаҙна), таджик (панҷшанбе) паза татар (пәнҗешәмбе) тіллерінде «чечімедең сығара пизінҷі кӱні» теенін таныхтапча.

Алған орын