Прокопчик, Анатолий Павлович

Анатолий Павлович Прокопчик
Тӧреен кӱні	1923
Тӧреен чирi	Новоалександровка аал, Мариинск уезді, Томск губерниязы, РСФСР, СССР
Ӱреен чылы	28 ӱртӱн айы 1943({{padleft:1943|4|0}}-{{padleft:9|2|0}}-{{padleft:28|2|0}})
Ӱреен чирi	Балыко-Щучинка аал хыринда Кагарлык аймаанда, Киев облазы, Украина ССР, СССР
Хазна	СССР
Войско кӧрімі	артиллерия
Аарластығ ады	кічіг лейтенант
Часть	309-ҷы атығҷылар дивизиязының 957-ҷі атығҷылар полкы
Должность	миномёт взводының командирі
Чаалазағлар/чаалар	Илбек Адалығ чаа
Сыйыхтар паза премиялар

Анатолий Павлович Прокопчик (1923, Томск губерниязы^[d] — 28 ӱртӱн айы 1943, Кагарлыкский район^[d], Киев облазы^[d]) — совет чааҷызы. Илбек Адалығ чаа араласчызы. Совет Союзының Матыры (1943, ӱреен соонда). Кічіг лейтенант.

Чуртас чолы

Анатолий Павлович Прокопчик 1923 чылда СССР РСФСР-ның Том губерниязының Мариинск уездіндегі Новоалександровка аалда (амғы Россия Федерациязының Кемеров облазындағы Чебулинскай аймах) кресеннер сӧбірезінде тӧреен. Орыс. Іҷе-пабазынаң ирте ӧкі халып, сигіс часха читіре олған туразында ӧскен. 1931 чылда аны Іскеркі Сибирь крайындағы Хакас автоном облазының Сыралығ Ӱӱс аймааның Малое Озеро аалның чуртағҷызы Т. О. Тихонова сӧбірезінзер алып алған. Анда А. П. Прокопчик читі класстығ школаны тоос салған. Чааҷы службазына тартылар алнында совхозта тракторист полған.

Тоғысчы-кресеннернің Хызыл Армиязына А. П. Прокопчик Сыралығ Ӱӱс аймах военкомады пастыра 1941 чылның улуғ хырлас айының 13-ҷі кӱнінде тартылған. Ағбан городта кічіг лейтенанттар курстарын тоос салған, аның соонда 309-чы атығҷылар дивизиязына ызылған, аның санында фронтха парыбысхан. Немец-фашист азымахчыларынаң тоғыр чаалазығларда кічіг лейтенант А. П. Прокопчик 1942 чылның от айынаң сығара Воронеж фронтында 6-ҷы армияның 309-ҷы атығҷылар дивизиязының 957-ҷі атығҷылар полкының миномёт взводының командирі полған. Пастағызын на Воронеж-Ворошилов операциязы тузында Лиски городтың іскеркі пазында чааласхан. 1942 чыл тоозылғанҷа, Дондағы позиция чаалазығларында араласхан.

1942 чылның улуғ хырлас айында 309-ҷы атығҷылар дивизиязы 40-ҷы армияа пиріл парған. 1943 чылның хысхы — часхызында А. П. Прокопчик Острогожск-Россошь, Воронеж-Касторное паза Харьков ӱчӱн операцияларында позының подразделение санында Острогожск, Богодухов, Харьков паза Белгород городтарны ыырҷы холынаң позытхан. Харьков алтында немецтер кірчеткен туста 309-ҷы атығҷылар дивизиязы, Белгород облазының Ракитянскай аймаанзар нандыра пазып, Пролетарский посёлок хыринда арачыланыс позициязында турыбысхан. Аны 1943 чылның чайғызына теере тутхан. 1943 чылның от-орғах айында Анатолий Павлович Курск тӱгеезінде паза Белгород-Харьков операциязында чаалазығның арачыланыс чардығында араласхан, Лебедин городты ыырҷы холынаң позытхан. Днепр ӱчӱн чаалазығда махачызын кӧзіт пирген.

Курск тӱгеезінде немец-фашист войсколарын унада сапхан соонда, совет войсколары тынағ даа чох Украинаның сол хазын ыырҷы холынаң позыдарға пастааннар. Сумы-Прилуки операцияда Днепр ӱчӱн чаалазығда кічіг лейтенант Прокопчиктің миномёт взводы кірчеткен пехота санында полған. Ол атызынаң 957-ҷі атығҷылар полкының 3-ҷі атығҷылар батальонына алнынзар чол азарға хабасхан. Сумы областьтың Липовая Долина аймааның Подолки хуторындағы чаалазығда 1943 чылның ӱртӱн айының 6-ҷы кӱнінде Прокопчиктің миномётчиктері чичең атыснаң ыырҷының 3 контратаказын тохтатханнар. 1943 чылның ӱртӱн айының 9-ҷы кӱнінде Лохвица городсар парчадып, кічіг лейтенант Прокопчиктің миномёт взводы, азых позицияа сығып, килчеткен немец пехотазын тохтабин ат сыххан. Вермахттың 50-ҷе солдат-офицері чох иділген, пасхазы тискен. Іди 3-ҷі атығҷылар батальоны 20 километрні тобырған. Лохвицы паза Пирятинні позытхан соонда, 309-ҷы атығҷылар дивизиязы, тоғырланысха тоғаспин, чапчан Днепрзер чол тутхан. 1943 чылның ӱртӱн айының 21-ҷі кӱнінде пастағы отрядтар санында Переяслав городтың кидеркі сариндағы суғның сол хазында сых килген. 1943 чылның ӱртӱн айының 24-ҷі кӱнінің хараазына 957-ҷі атығҷылар полкының штурм батальоны санында Прокопчиктің миномёт взводы пастағыларынаң хада Днепр суғны Балыко-Щучинка аал хыринда кис парыбысхан. Балыко-Щучинка аал ӱчӱн чаалазығда Анатолий Павлович взводынаң хада ыырҷының тылынзар кіріп, аның позициязынҷа миномётнаң ат сыххан. Ыырчы хорылысха кір парған. Аал ыырҷы холынаң позыдылған. Миномётнаң піліп атып, пехотаа алнынзар парарға хабазып, Прокопчиктің чааҷылары Днепрнің оң хазындағы плацдармны пиктирге полысханнар. Андар соонаң полктың ӧӧн кӱстері кис килгеннер. Плацдармда тӧрт хоных изере чаалазып, кічіг лейтенант Прокопчик взводынаң хада ыырҷының 18 контратаказын тохтатхан. Холындағы чааҷылары чох хала парған Анатолий Павлович ухтаҷаң, кӧстеҷең кізі полған паза позы ыырҷы пехотазын ат сыхчаң. Ыырҷының 40 солдат-офицерін чох идібіскен. 1943 чылның ӱртӱн айының 28-ҷі кӱнінде харнына аар палығладып, нинҷе-де час пазынаң ӱреп парған. Аны Украинаның Киев облазының Кагарлык аймаандағы Балыко-Щучинка аалында совет чааҷыларының сыырадында чыып салғаннар.

СССР-ның Ӧӧркі Чӧбінің Президиумының 1943 чылның чарыс айының 23-ҷі кӱнінде сыххан чахиинаң, кічіг лейтенант Анатолий Прокопчикке Совет Союзының Матыры ат ӱреен соонда пирілген.

Сыйыхтар

• «Алтын Чылтыс» (23.10.1943, ӱреен соонда);
• Ленин ордені (23.10.1943, ӱреен соонда);
• Хызыл Чылтыс ордені (11.10.1943, ӱреен соонда).

Хумартхызы

адалых, А. Прокопчиктің орамазының 30 № туразында хумартхы чарды хызылған. Малое Озеро аалның ортымах школазы матырның адынаң адалған, анда хумартхы парта азылған. Матырның ады Ағбандағы Чиңіс паркындағы хумартхы тастарның пірсінде пазылған.

Алған орын

Пічіктер

• Общедоступный электронный банк документов «Подвиг Народа в Великой Отечественной войне 1941—1945 гг.»  (неопр.)

Дата обращения: 30 Чарыс айы 2025.

• Представление к званию Героя Советского Союза  (неопр.)

. Дата обращения: 30 Чарыс айы 2025. Архивировано 2 Сілкер айы 2013 года.

• Орден Красной Звезды (наградной лист и приказ о награждении)  (неопр.)

. Дата обращения: 30 Чарыс айы 2025. Архивировано 2 Сілкер айы 2013 года.

• ЦАМО, ф. 33, оп. 11458, д. 251  (неопр.)

.

Литература

• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
• Глазков М. Д. Рубежи бессмертия. — Красноярск: Красноярское книжное издательство, 1975. — С. 100. — 104 с.
• Достоин звания героя: красноярцы — Герои Советского Союза / сост. И. Т. Рева. — 2-е изд., перераб. и доп. — Красноярск: Книжное издательство, 1975. — С. 61—62. — 382 с.
• Аграрный форпост шахтёрского края / сост. Л. Гарбузова, Г. Шалакин. — Кемерово: Кузбасская книга, 2005. — С. 19. — 179 с. — ISBN 5-89687-052-3.
• Верховцева З. П. Величие подвига на днепровских рубежах. — Кемерово: Кузбасс, 2003. — С. 78—80. — 175 с. — ISBN 5-85905-265-0.
• Тисульский район. Чебулинский район // Всекузбасская книга памяти / ред.-сост. Верховцева З. П. — Кемерово, 2000. — Т. 7. — С. 358—360. — 583 с.
• Наши отважные земляки: Красноярцы — Герои Советского Союза / Сост. В. Н. Пугачёв, И. Т. Рева. — Красноярск: Книжное издательство, 1990. — С. 316—318. — 479 с.

Ссылкалар

• Прокопчик Анатолий Павлович на www.az-libr.ru  (неопр.)

. Дата обращения: 30 Чарыс айы 2025.

• Чебулинцы в Великой Отечественной войне  (неопр.)

. Дата обращения: 30 Чарыс айы 2025.