Владимир Путиннең кӧні палғалыс (2024)

Владимир Путиннең кӧні палғалыс (2024)
Президент России Владимир Путин в ходе прямой линии (2024)
Пастағызын иртірген кӱні	24 декабьда 2001 чылда
Удаа иртірілчеткені	чыл сай
Тимнепче	Россия президентінің устағ-пастаа
Сайт	москва-путину.рф

Владимир Путиннең кӧні палғалыс (2024) — Россия президенті Владимир Путиннің кӧні палғалысча чыл сай полчатхан хабарҷылар чыылии. Кӧні эфирде 19 декабрьда 2024 чылда 4 сағат 27 пағат ирткен. Кӧні линияа аймах оңдайҷа (телефонҷа, СМС-искіріглер паза Интернетче) кірген айланыстар саны 2,5 миллион ас парған.

Тимненіс

2024 чылның улуғ хырлас айының 8-ҷі кӱнінің 00:00 улуғ хырлас айының 19-ҷы кӱніне теере Россия президентіне пазылған паза видеоға суурылған сурығлар ӧнетін мобильнай приложениеҷе, СМС-искіріглерінҷе, телефонҷа, «ВКонтакте» паза «Одноклассники» социальнай сетьтерҷе паза moskva-putinu.ru (москва-путину.рф) сайт пастыра алылғаннар.

2024 чылда «Чон фронтының» штабындағы call-кінінің тоғынҷылары кізілернің айланыстарын ӱзӱрер ӱчӱн, пастағызын на искусственнай интеллектнең тузаланғаннар. GigaChat нейросеть социальнай сетьтердегі, аудио паза СМС-искіріглерні таллалған темаларҷа чар пирген.

2024 чылның улуғ хырлас айының 11-ҷі кӱнінде Владимир Путин, Москвадағы «Сбернің» ӧӧн офизінде полып, Искусственнай интеллект киреенде асхан нимелер кӧзідиинең танысхан. Андада GigaChat хазна пазына чон кӧні палғалысча иң удаа кӧдірген сурығларны азынада искір пирген:

Пілдістіг, хайдағ сурығларға азынада тимненерге кирек, хайзылары иң кӧптер: чурттың чахсы оңдайлары паза аны ал полар оңдай, транспорт инфраструктуразы, имнег кирее, хазна структуралары паза пірігістер, пособиелер.

Владимир Путин чонның кӧні палғалысча айланыстарының ӧӧн темаларынаң танызып алған (2024)

2024 чылның улуғ хырлас айының 19 кӱнінің танығлары хоостыра, кӧні палғалысча аймах оңдайнаң кірген айланыстар саны 2,5 миллион ас парған. Иң кӧп айланыс кірген Центральнай, Алтынзархы-Кидеркі паза Ӱстӱнзархы федеральнай округтардаң. Иң удаа регионнардағы газификацияа, топливо, чурт паза коммунальнай хоных услугалары паазы ӧсчеткеніне, ӧнетін чаа операциязының араласчыларына паза оларның сӧбірелеріне хабазарына теелген сурығлар кӧдірілгеннер.

Итоги 2024 чылның салтарлары

Эфирнің ӧӧн сурығларның санында Россияның социальнай политиказы (20 % айланыс), чурт (9 %), экономика (9 %), хазых хайраллиры (8 %), ЖКХ (8 %), СВО (6 %) полғаннар.

Экономика

Хазна пазы 2024 чылның экономиказын «пик паза ізестіг» тіп кӧзіткен. ВВП ӧзізі 3,9 % читче, 2025 чылда 2,5 % полары кӧрілче. Олох туста ЕС-та ниме полчатханынаң тиңнестірген (2024 чылда ВВП ӧзізі чоғыл) паза США (6% чағын). Россиядағы тоғыс чохтарның уғаа тӧбін синін (2,3 %) алынҷа таныхтаан. Ідӧк Владимир Путин Россия Федерациязындағы обрабатывающай промышленность сығарызы илееде ӧс парғанын чарытхан. Анзы хазнаның суверенитеді тыыпчатханын кӧзітче.

Владимир Путин: «Экономика сині пик паза ізестіг».

2024 чылда 9 % чит парған инфляцияны чарыдып, президент аның объективнай паза субъективнай сылтағларын искірген. Объективнай сылтағлар санында:

• Россияда тузаланчатхан нимелер сині ӧсче;
• тилекейде паалар ӧсчелер, олар, тізең, логистикаа теелчелер.

Объективнай сылтағлар санында:

• Центробанк инфляцияа теелчеткен тиріглернең тузында нимес тузаланча, олар ӧӧн ставканаң палғалыстығ ниместер;
• Россия Федерациязының правительствозы хайзы отрасльларны тузында тиліт полбинча.

Алынҷа президент Россияның наа регионнары тіп адалчатхан чирлернің экономика синін чарыт пирген, налог чыылчатханы ЛНР -да (ӧзіс 90 %), ДНР-да (79 %), Херсон паза Запорожье областарында (200 %) ӧсчеткенін таныхтаан.

СВО

Владимир Путин талай пехотазының 155-ҷі алынҷа гвардия бригадазының флагынаң хада

СВО-ға теелчеткен сурығларға нандырар алнында, Владимир Путин талай пехотазының 155-ҷі алынҷа гвардия бригадазының чааҷылары ағаа пос чааҷы знамязын читіргеннер тіп искірген, ол аны студияда чазыбызарға чахаан. Чааҷыларға оң поларын, Чиңіске чидерін паза ибзер иптіг айланарын алғаан. Хазна пазының сӧстерінең, чааҷылар полған на кӱн фронттың прай линиязынаң алнынзар иртчелер. Курск облазының чуртағҷызынаң чоохтазығ тузында, аның ВСУ-ны Россия хырығларынаң хаҷан хыйа идерлер тіп суриина, президент чарытхан: «ооллар чааласчалар, сағам парча чаалазығ», «піс оларны хайди даа сығарыбызарбыс» тіп ізендірген. Россия пазының сӧстерінең, Курск облазындағы атылған техника, 2023 чылда фронттың прай линиязында чох иділген танктар, БМП паза пасхазынаң ас парыбысхан. Олох туста Владимир Путин прай гражданскай паза социальнай объекттер иптелер, пос чурттары паза квартиралары чох халған кізілерге чурт алар сертификаттар пирілер, ол кирекке 108 миллиард салковай ызылған тіп искірген. Ідӧк Херсон, Запорожье областьтарын, ЛНР-ны паза ДНР-ны иптирінеңер чоох парған. Ол санда, ӱс чыл аразына пу регионнарның чол палғалызы кирек синіне теере иптелер, Азов талайының ибіре тӧрт чоллығ кольцо трассазы пӱдірілер, 20 муң социальнай кӧстегліг объект паза чурт иптелген тіп таныхталған.

Владимир Путин кӧні палғалыс тузында (2024)

Президент ідӧк СВО-дағы чааҷыларға террористтердең тоғыр операция режимінің нимес, че чаа киректері араласчылары статузын пирердеңер сурығларны чарыт пирген. Анзы тӱзеділер, чааҷылар «ниме оларға кирек, прай ниме аларлар, санап пирербіс» тіп таныхтаан.

Владимир Путин «Матырлар тузы» программаның чуртасха кирілчеткенін паалаан. Аның хоостыра СВО араласчылары кадрлар резервін тимнепчелер. Президенттің чооғынаң, андағ курстарны тӧстир сағыс ӧнетін чаа операциязының студент-араласчыларынаң тоғасхан соонда килген. Чааҷылар аразында улуғ компаниялар, муниципальнай пӱдістер, министерстволар паза ведомстволар устағҷылары полар кізілерні таллап аларға кирек:

Пір дее саба ниме иділбеен… Кӧбізіне айланыс иділген, бизнеске, ӱлгӱ органнарының прай синнерінге парчалар.

Владимир Путин СВО-ны пастир чарадығны аның алнындох аларға, ағаа тимненерге кирек полған тіп таныхтаан паза ӧнетін операцияның ӱс чылы аны хайди алыстырғанынаң ӱлескен:

Мин асхынах хормачылан сыххам паза хатхырбин даа сыхтым.

Хорғыс чох поларынҷа стратегия

Кидеркі СМИ-ларның НАТО подразделениелері «Орешникке» удур сабыс пир поларынҷа искіріглерін чарыдып, Владимир Путин эксперимент иртірібізер чӧпнең сыххан:

Западнаң Украина Киевте орын таап салзыннар, анда прай ПВО системаларын турғыс салзыннар, піс андар «Орешникті» позыдыбызарбыс, олар, тізең, аны тудып алзыннар, кӧрербіс, ниме полар.

Пу БРСД (ортымах ырахха учухчатхан баллистика ракетазы) ноға іди адалчатханы хоостыра, президент теен: «Сынап чоохтаза, пілбинчем».

Чоннар аразындағы сурығлар

Кӧні палғалыс тузында Владимир Путин хайзы чоннар аразындағы амғы сурығларға нандыр пирген. Ол санда, Сирияның полған президенті Башар Асаднаң, анзы Москвазар кӧскен соонда, ам даа тоғаспааның искірген. Россиянаң Сирия турғысхан пӧгіннер толдырылғанын, РФ-ның Тирігліг кӱстері анда «террорист анклавы» пол килеріне харығ полғаннарын таныхтаан. NBC репортёрының «Россия СВО пӧгіннерін толдыр полбаан, генералларын чідірче, кӱзін хорат салған» тіп искіриин чарыдып, президент Россия халғанҷы чылларда экономиказын, суверенитедін, арачыланҷаң оңдайларын уламох пиктебіскен тіп искірген:

Сірер Россия кӱзі чох поларын сағыпчазар, мин пасха сағынчам.

Ідӧк Путин американ репортёры генерал Игорь Кирилловтың Москвадағы ӧдірізін ӧнетін иділген ниме теенінде тудып алған. Олох туста ӧнетін службалар «пу сабысты иртірібіскенін» таныхтаан. Хыдаттағы «Синьхуа» искіріг агенствозының кізізі Россия пазын РФ-ның паза КНР-ның палғалыс синін паалабызарға сурынған. Путин ікі хазнаның товаробороды 200 млрд долларға, инвестпроекттер саны 600-ке читкенін, регионнар синіндегі палғалыс ӧс парғанын чоохтаан:

Пістін регионнарның устағҷылары хыдат кізілернең аралазары ідӧк ӧӧні полча. Арағаҷах анда парох, че кирек синінде.

Социальнай политика

Демография суриин пӧгері ӧӧннерінің пірсі полча. Тӧріпчеткеннер саны иң тӧбін синінге чит парған — 1,41% теере. Пала тапчаң частығ ипчілер саны 30% хызырыл парған. Владимир Путиннің сӧстерінең, пала табарын иң асхынах 2,3%-ке ӧскірерге кирек. Хазна полызығлары хоостыра, президент іҷе капиталы, сӧбіре ипотеказы программаларын паза палалығ сӧбірелерге пірге пособие тӧлеглерін таныхтаан.

Хазна пазы миграция политиказының суриин «уғаа чуға» адаан. Аның кӧрізінең, мигранттар санын хызырар ӱчӱн, пӧзік технологиялығ тоғыс сфераларына хайығ айландырып, істеніс тӱзімін кӧдірерге кирек. Ідӧк Россиязар тоғынарға килчеткен кізілерге кирексіністерні хатығлирға, ӱгредіг чардығын ӧскірерге кирек. Пасха хан чирі кізілері РФ-ның культура оңдайларын, тілні пілерге киректер. Алынҷа халығлар иділ парғаннар тіп таныхтаан Россия пазы. Кӧзідімге, орыс тілін пілчеткен олғаннарны школаа алҷаң закон алыл парған.

Хазых хайраллиры

Владимир Путин Нижний Новгород чуртағҷызының поликлиникаларда имҷілер чидіспинчеткенінеңер хобына нандырған. Аның чооғынаң, иң кӧп имҷілер хазых хайраллаҷаң пастағы звенода чидіспинчелер, аннаңар орындағы ӱлгӱ алнында чиит специалисттерні тоғысха тартар пӧгін турча, ідӧк оларға тоғысты орта ӱлестір пирерге кирек. Ідӧк кӧні линия тузында имнер промышленнозының тилізін паза пос препараттар сығарызын ӱзӱргеннер.

Интернет

Блогер Влад А4 Владимир Путиннге Россияда YouTube ағырин тоғынып пастабысханы хоостыра сурығ пирген. Хазна пазы платформаның ээзі полчатхан Google компания холына кірчеткен РФ-дағы предприятиелерінің ахчазын, техниканы кирерін хызырыбысханын, аның ӱчӱн сервис уйан тоғынчатханын чоохтаан.

Политиктердеңер

Эфир тузында Владимир Путин Россияның паза пасха хырығ озариндағы политиктердеңер чоохтанған. Ол санда, кемнең хада чей ізерҷік тіп сурыға нандырып, Гельмут Кольны сағысха кирген:

Канцлер Кольнаң тоғазарҷыхпын...ол улуғ политика деятельі полған, ол Германияа кӧп ниме иткен.

Ведущай Владимир Жириновскийнің Украина, Ближний Восток хоостыра азынада пілгенін чарытхан:

Ол эпатажха хынған, че алғым пілістіг кізі полған. Аннаңар аның ухааны чуртасха кирілҷең: олар сын опытха паза пілістерге тӧстенгеннер.

Позының оолғы Хантернің пырозын тастаан Байденнеңер:

Хаҷан даа аарлығ, синде политигің алай кізің кӧп. Байденде кізізі кӧп арах полтыр.

Борис Ельциннеңер:

Ельцинге Западта хынҷаңнар, че хаҷан ол Белград бомбардировкалары хоостыра ӱнін кӧзіт пиргенде, аны сах андох сӱріс сыхханнар паза ізеечі сӧклеп сыхханнар.

Зеленскийнің алнындағы чуртазынаңар:

Кемге ол тоғынча, ол кізілер аны кӧрерлер.

Президенттің хормачы чооғы

Кӧні линия тузында Россияның істіндегі сидіксіністерінеңер кӧп арах сағынарын хатап таныхтап, президент хормачы чоох чоохтап пирген:

Сӧбіре стол кистінде одырча. Оолах іҷезінең сурапча: «Таптырғаста ӱс буквалығ хайдағ сӧс полҷаң?». Сах андох хамағына самнах тазылапча. Аның соонҷа ирінең ипчізіне читче. «Ибдеңер сағынарға кирек», — чоохтапча ол.

Аудитория

Mediascope істезіг компаниязының искіриинең «Владимир Путиннең чыл салтарын» 17 миллионҷа кӧрігҷі кӧрген. Тиксі каналлар пастыра аудиторияның чардығы (тиксі кӧрігҷілер санынаң телепрограмманы кӧрген кізілернің ортымах саны проценттерде) 63,4% читкен. Трансляция рейтингі (чонның тиксі санынаң проценттерде кӧзіділген телепрограмманы кӧрген кізілернің ортымах саны) 12,5% тиңнелче. Программа кӧзіділген телеканалларда:

• Пастағы канал;
• «Россия-1»;
• «Россия-24»;
• НТВ;
• «Соловьев Live»;
• «Мир»;
• «Пизінҷі канал»;
• РЕН ТВ.

Линия салтарынҷа чарадығлар

Вице-премьер Дмитрий Чернышенконың искіриинең, кізілернің хоптары кірчеткен туста удаа правительствоның координация кінінде кӧрілгеннер. Ведомстволар аразындағы палғалыс механизмі тоғынған, іди министрлернің полысчылары прай кӧстеглерҷе мындағ сурығларны пӧгібіскеннер:

• кӧп палалығ сӧбірелернің авиация учуғызында 50% ниик пазынаң тузаланары (вице-премьер Виталий Савельев Минтрансха килістіре чахығны пирген, 2025 чылның кӱрген айының 14-ҷі кӱнінең сығара андағ оңдай прай палаларға 12 часха теере пирілче);
• банктарны кредитті алар пічіктерні тимнепчеткен паза аны алған тус аразындағы «период охлаждения» тіп нимені кирдірерлер (ол 50 муң салквайдаң пасти тоғынар, 4 сағаттаң 2 кӱнге теере узарадылар);
• правительство кнезі Михаил Мишустин Курск облазының арачылағҷыларына СВО-ның пасха араласчыларына чіли тӧлеглер алҷаң правоны пирчеткен пічіктерде хол салған;
• льготалығ ипотека хазна программазының лимиді чох полчатханынаңар искірілген;
• сӧбіре ипотеказын ікінҷі рынокта алғыдарынаңар чӧп пирілген;
• пала сағыпчатхан паза тӧріткеннерге пособиені иң асхынах чуртас синіне теере ӧскірерге чӧп пирілген (РФ-ның істеніс паза социальнай арачыланыс министрі Антон Котяков таныхтаанынаң пала сағыпчатхан паза тӧріткен пособие сині студенттерге 17 муң салковайға ӧс парарға айабас);
• улуғ нимес парыстығ сӧбірелерге социальнай контракттарнаң тузаланар оңдайларны ӧскірерге чӧп пирілген.

Алған орын