Хынған сағыстар сыбызы
| «Хынған сағыстар сыбызы» | |
|---|---|
 | |
 | |
| Тип | полызығ итчең чӧрім |
| Тӧстелген | 2018 |
| Тӧстегҷілер | «Миннең хада сағын» проект |
| Орныхча |
 |
| Ӧӧн кізілер |
Артур Орлов («Пастағылар чӧрімі» устағның кнезі) Тимур Сафин («Пастағылар чӧрімінің» пазының чӧпчізі) |
| Представительство | «Пастағылар чӧрімі» |
| Айғасчатхан кирее | полысханы, чонға полызығ |
| Сборлар | 4 азыра млрд азыра салковай (прай тус аразына 2025 чылда) |
| Сыйых пиргені | 120 азыра муң араласчы (2025) |
| Добровольцецтер саны | 20 муң азыра (2025) |
| Араласчылар саны | 1,5 муң азыра партнёрлар пірігізі (2025) |
| Слоган | «Наа чылны удурлааны — ол чапсыстығ ниме итчең паза полызығ кирексіпчеткен улусха хабасчаң сылтағ» |
| Сайт | елкажеланий.рф |
«Хынған сағыстар сыбызы» (орыс. Ёлка желаний) — олғаннарның, улуғ частығларның паза хазыхтаң уйан кізілернің хынған сағыстарын толдырарға кӧріл парған Россиядағы чонға полызығ итчең чӧрім. Аны Чииттер киреенҷе федеральнай агентство хабазиинаң 2018 чылдаң сығара чыл сай «Пастағылар чӧрімі» иртірче[1].
Проектте полған на кізі («толдырығҷы») пасха кізінің («сағынчатхан кізінің») сағынған сағызын чуртасха кирер оңдайлығ. Тӧстелгеннең пеер чӧрім Россияның полызығ пирҷең иң килкім пастағларының пірсі пол парған, ол тиксі хазнаҷа нинҷе-нинҷе муң араласчы паза партнёр пірігістерін піріктірче[2].
Тархын
«Хынған сағыстар сыбызы» 2014 чылда Татарстандағы волонтёрлар пастаа чіли пасталған «Миннең хада сағын» тіп полызығ итчең проекттің чардығы полыбысхан. Пастап проекттің пӧгініне аар ағырчатхан олғаннарның паза улуғ частығларның хынған сағыстарын толдырары — ӧӧнінде ахчаа паалалчатхан сыйыхтар итпин, кӧңнілерін кӧдірерге паза чахсы сағыстар артызарға — алылған. Пастап, самолёттың штурвалын тудып, учуғарға иткен хызыҷахтың сағызы толдырылған[3].
2018 чылда проект «Россия — наа оңдайлар чирі» тіп президент платформазының санына кірген. Олох чылның улуғ хырлас айында Москвада ирткен Пос кӧңніліглернің чоннар аразындағы форумында Россияның президенті Владимир Путин проектнең танысхан, пис паланың сағынған сағызын толдырып, анда араласхан. Тӱрчедең наа чыл чӧрімі «Хынған сағыстар сыбызы» адал парған[4].
Пастағы чӧрім 2019 чыл килер алнынҷа ирткен. 2018 чылның улуғ хырлас айының 27-ҷі кӱнінде Москвадағы Кремльде Хазна Чӧбінің чыылии хоостыра наа чыл сыбылары турғызылғаннар, олар олғаннарның хынған сағыстары пазылған открыткаларнаң чазалғаннар. Правительство кізілері, министрлер паза губернаторлар чӧрімге хозылғаннар, сыбыларнаң хынған сағыстығ шарларны суурып, оларны толдырғаннар. Пола-пола чӧрімге пасха хазна кізілері паза парыс итчеткен пірігістернің кізілері, ідӧк олаңай кізілер хозылғаннар[4].
2022 чылдаң сығара чӧрімні «Пастағылар чӧрімі» пірігіс иртір сыххан[1].
Тоғыс
Чӧрімнің ӧӧн пӧгіні наа чылның хайхазын паза ӧрінізін сыйлиры полча. Араласчылар, «сағынчатхан кізілер» айланыстарын проекттің официальнай сайтында артысчалар. Оларның хынған сағыстары партнёрларның ачыхтарында турғызылған сын паза виртуальнай сыбыларда пол килчелер[4][5].
Хынған сағыстығ араласчыларның категориялары[4][5]:
- 3-17 частығ олғаннар паза 60 час ас парған кізілер;
- ӧкіс паза іҷе-паба хайии чох халған олғаннар;
- хазии уйан алай кинек олғаннар паза улуғлар;
- чуртасха хорғыс ағылчатхан хазыхтығ олғаннар;
- чуға чуртапчатхан сӧбірелернің палалары;
- Ӧнетін чаа операция араласчыларының сӧбірелерінің олғаннары;
- Донецк, Луганск Чон Республикаларында, Запорожье паза Херсон областьтарында, ідӧк оларның хырығларында атыстар ӱчӱн ӱреге кірген регионнарда чуртапчатхан олғаннар[4][5].
Чӧрімнің араласчылары артысхан сағыстар ахчаа турчатхан (кӧзідімге, онаҷахтар, гаджеттер, спорт тиріглері) алай пасха (пасха городсар чорых, саблығ кізінең тоғазығ, мероприятиее парары) полчалар. Сыйых алчатхан кізее сағыбаан ниме поларға айабас, «толдырығҷы», «сағынчатхан кізінің» кирексіністерін паза хынчатхан киреен санға алып, пос алынҷа сыйыхты таллапчатхан оңдай кӧріл парған[4][5].
2025 чылға полған на кізі «толдырығҷы» полар оңдайлығ, ағаа сайтта алай партнёрлар кіннерінің пірсінде сыбынаң открытка суурып, хынған сағысты таллап аларға чарир. Чӧрімде очнай алай ыраххы оңдайнаң аралазары кӧріл парған. Олаңай кізілердең пасха, чӧрімде компаниялар, хазна учреждениелері паза халых пірігістері араласчалар[6].
Чӧрімнің салтарлары паза улии
2018 чылда «Хынған сағыстар сыбызы» чӧрім тузында 450 сағынған сағыс толдырылған. Чыл сай оларның саны ӧзіп одырча[4]:
- 2020: 13,5 азыра муң сағыс толдырылған;
- 2021: 38 азыра муң сағыс толдырылған;
- 2022—2023: 47 муңҷа сағыс толдырылған;
- 2023—2024: 60 муңҷа сағыс толдырылған[4].
2025 чылның халғанҷы айларының танығларынҷа, чӧрім пасталғаннаң 320 азыра муң сағыс толдырылған, оларның паазы 4 млрд-ча салковайға тиңнелче. Чӧрімде 120 азыра муң толдырығҷы паза 1,5 муң партнёр пірігізі араласхан. Чӧрім чоннар аразындағы синге читкен: анда Испанияда, Италияда, Францияда, Кипрде, Сербияда чуртапчатхан Россияның кізілері араласчалар[2][4].
Партнёрлар
Чӧрімнің ӧӧн партнёры Россияның чииттері полча. Аның иртірерге полызығ итчең чыындылар, халых паза парыс итчеткен пірігістер хабасчалар: кӧзідімге, «Внуки» чыындынаң палғалыс хоостыра чалғыс аға-ууҷаларның сағынған сағыстары толдырылчалар[7].
Наа оңдайлар
2025 чылдаң сығара чӧрімнің наа форматтары чуртасха киріл сыхханнар:
- «Столға ӱлӱкӱн» — «Русь» паза X5 Group азых-тӱлӱк чыындыларының чуға чуртапчатхан сӧбірелерге ас-тамахнаң хабасчаң хада-пірге чӧрімі[8];
- «Сыйыхтығ пархалар» — «Внуки» чыындының улуғ частығларға хабасчаң хада-пірге тоғысты алғыдары[7].
Алған орын
- ↑ 1 2 Ёлка желаний 2025. Ёлка желаний. Дата обращения: 9 Улуғ хырлас айы 2025.
- ↑ 1 2 Всероссийский Дед Мороз из Великого Устюга дал старт акции "Ёлка желаний". РИА Новости. Дата обращения: 9 Улуғ хырлас айы 2025.
- ↑ О проекте. Мечтай со мной. Дата обращения: 9 Улуғ хырлас айы 2025.
- ↑ 1 2 3 4 5 6 7 8 9 Что известно о всероссийской акции "Ёлка желаний". ТАСС. Дата обращения: 9 Улуғ хырлас айы 2025.
- ↑ 1 2 3 4 Загадать желание. Ёлка желаний. Дата обращения: 9 Улуғ хырлас айы 2025.
- ↑ «Елки желаний»: как выбрать площадку, партнеров и не промахнуться с подарком. Милосердие.ru. Дата обращения: 9 Улуғ хырлас айы 2025.
- ↑ 1 2 Акция "Внуки с подарками". VK: Акция «Ёлка желаний». Дата обращения: 9 Улуғ хырлас айы 2025.
- ↑ Фонд X5 «Выручаем» поможет нуждающимся семьям в подготовке новогоднего стола. Сибирское Агентство Новостей. Дата обращения: 9 Улуғ хырлас айы 2025.