Тиксі тилекейдегі виски кӱні
| Тиксі тилекейдегі виски кӱні | |
|---|---|
| Jack Daniel’s виски ідізі Jack Daniel’s виски ідізі | |
| Тип | Тиксі тилекейдегі ӱлӱкӱн |
| Закон хоостыра | World Whisky Day |
| Кӱні | сілкер айының ӱзінҷі чечімезі |
| 2024 | 18 майда |
| Кибiрлер | Вискині тимнирі паза ізері |
| Палғалыстығ | вискинең |
Тиксі тилекейдегі виски кӱні (орыс. Всеми́рный день ви́ски, англ. World Whisky Day) — чыл сай сілкер айының ӱзінҷі чечімезінде тилекейнің аймах хазналарында таныхталчатхан чоннар аразындағы ӱлӱкӱн. Шотландец Блэр Боуменнің пастаанаң 2012 чылда пол килген.
Тархын
«Солод вискизінің пірігізінің» тӧстегҷізі шотландец Блэр Боуменнің пастаанаң 2012 чылда кирілген ӱлӱкӱнге саналча. Абердинскай университетте ӱгренчеткен туста, сілкер айының пір кӱнінде хада ӱгренчеткеннерін Шотландия вискизін амзап кӧрерге хығырған. Соонаң андағ хатығ суғны амзир кибір тиксі тилекейҷе тарап парыбысхан. Кӧп чыллар пазынаң пу киректе ол саблығ эксперт, чоннар аразындағы синдегі критик, «Ізептегі виски справочнигі» кинденің паза кӧп статьяның авторы пол парған[1].
Кибірлер
2014 чылның сілкер айында ӱлӱкӱнні Шотландия парламентінің араласчылары чаратханнар. Пір чыл пазынаң чоннар аразындағы White Light Media холдингтің холындағы изірткідеңер пасчатхан Hot Rum Cow Америка журналы ӱлӱкӱн тимненізінең айғас сыххан. Издание Тиксі тилекейдегі виски кӱніне чарыдылған сайтты апарча. Чыл сай сілкер айының ӱзінҷі чечімезінде ол сайтта пазылған аймах мероприятиелер иртірілче. Анда посха киліп алай ырахтын даа аралазарға чарир. Араласчылар вискині амзап, социальнай сетьтерде #worldwhiskyday хэштег турғызып, сомнарын сығарчалар. Пайрамны иртірчеткеннернің саннары хоостыра, Тиксі тилекейдегі виски кӱніне аймах чылларда чарыдылған мероприятиелерде 150 хазнаның 250 муңҷа кізізі араласхан [1].
Hot Rum Cow журналның тоғынҷылары видеолар суурчалар, вискині амзатырар чӧрімнер, пайрамнығ иирлер, мастер-класстар, эксперттер хығырығларын, вискинің паза пу хатығ суғнаң тимнелген коктейльлернің наа аймахтарының кӧзідіглерін иртірчелер, аарлығ сорттарны ниин паазынаң сатчалар, виски тимнепчеткен заводтарҷа экскурсиялар апарчалар. Тиксі тилекейдегі виски кӱніне чарыдылған купажты 2012, 2013 паза 2014 чылларда «Master of Malt» компания иткен[1].
Чапсых танығлар
- 2018 чылда Гонконгтағы аукционда удаа учурабинчатхан Macallan виски ідізін садыбысханнар. Аның пазы США-дағы 1,1 миллион долларға читкен[2]. 2023 чылда 1926 чылдағы Шотландия вискизінің ідізін 2,1 миллион стерлинг фунтына Лондондағы Сотбис аукционында алып алғаннар. Аукционның тоғынҷызы Джонни Фаул садығ алнында ағаа изіртіліг суғны амзап кӧрерге пиргеннерін искірген[3]:
Мин аның тамҷығын на амзап кӧргем. Ол уғаа толдыра татхыннығ, кӧп хурғадылған фрукттығ, специялығ, ағазы кӧп пілдірче. Аны ниме салбин поларға чарабас, толдыра суғ, уғаа чапсых татхыннығ.
- Шотландияда 2022 чылда Шотландия вискизінің иң чоон, 310 литрліг, ідізі чон алнына сығарылған. Ол 440 олаңай ідіске тиңнелче. Аның пӧзии — 1,8 метр. Чоон виски ідізін Эдинбургтағы аукционда США-дағы 1,4 миллион долларға садыбысханнар. Ол Гиннесстің Рекордтар киндезіне кірген[4].
- СМИ искіріглері хоостыра, Канада, Америка, Япония паза Ирландия вискилерін хада алза даа, Шотландия вискизі тилекейде оларнаң ікіҷе дее кӧп хати садылча[5].
- 2022 чыл тоозылчатханда, Шотландиядағы мының алнындағы Блэр замоктың (Перт-энд-Кинросс округ) улуғ нимес оразында, чазыттығ ізік кистінде 40 виски ідізі табылған. Ол изірткіліг суғ 1833 чыл тузында тимнелген[6].
- Россияда вискині тимнепчеткен нинҷе-нинҷе улуғ завод пӱдірілген. Технологтар танығларынаң, пос сырьезынаң нинҷе-нинҷе сорт идері кӧрілче[5].
- Чыл сай 27 мартта Чоннар аразындағы виски кӱні (англ. International Whiske Day) таныхталча. Ол 2009 чылда, Нидерландтарда изірткі фестивальларның пірсі иртірілчеткенде, тӧстелген.
- Чоннар аразындағы Шотландия скотчы кӱні 27 февральда таныхталча, Ирландия вискизі кӱні — 3 мартта, Бурбон кӱні — 14 июньда. США-да Шотландия вискизінің национальнай кӱні — 27 июльда[7].
Ідӧк кӧріңер
Алған орын
- ↑ 1 2 3 Международный день виски. ООО "Галерея Градусов" (16 Чарыс айы 2023). Дата обращения: 2 Сілкер айы 2024.
- ↑ Маляренко, Евгения. Бутылку виски на аукционе в Гонконге продали за рекордный $1,1 млн. РБК (19 Сілкер айы 2018). Дата обращения: 2 Сілкер айы 2024.
- ↑ Продан самый дорогой виски в мире: более 2 млн за бутылку. Маляренко, Евгения (19 Кічіг хырлас айы 2023). Дата обращения: 2 Сілкер айы 2024.
- ↑ В Шотландии продали самую большую в мире бутылку виски на 311 литров. Коммерсантъ (30 Сілкер айы 2022). Дата обращения: 2 Сілкер айы 2024.
- ↑ 1 2 Производители рассказали, как российский виски заменяет импортный. РИА Новости (1 Улуғ хырлас айы 2023). Дата обращения: 2 Сілкер айы 2024.
- ↑ В Британии старейший в мире виски продали на аукционе за $484 тысяч. ТАСС (7 Улуғ хырлас айы 2023). Дата обращения: 2 Сілкер айы 2024.
- ↑ 27 июля — Национальный день шотландского виски в США: история и традиции праздника. Известия (26 От айы 2023). Дата обращения: 2 Сілкер айы 2024.
Хоза литература
- Мальцев, И. В. Виски: История вкуса. — М.: Альпина нон-фикшн, 2010. — 420 с. — 10 000 экз. — ISBN 978-5-91671-043-4.
- Тузмухамедов, Э. Шотландский виски. — Современные розничные и ресторанные технологии, BBPG, 2001. — 336 с. — ISBN 5-93679-009-6.
- Charles MacLean. «Scotch Whisky: A Liquid History». — Cassell Illustrated, 2005. — ISBN 1844034011.