Кирек нимедеңер чоохтазығ
Кирек нимедеңер чоохтазығ — хазнаның тархынына, кибірлеріне паза культура ис-пайына чарыдылып, Россияның тиксі ӱгредігліг учреждениелерінде иртірілчеткен класстағы нимес уроктар. Школа программазына 2022 чылда кирілгеннер. Пастағы урокты Россия Федерациязының президенті Владимир Путин 2022 чылның ӱртӱн айының 1-ғы кӱнінде Калининградта иртірген. 2025 чылдаң сығара «Кирек нимедеңер чоохтазығ» тиксі Россиядағы сыйых тӧстелген. Ол пу дисциплинаҷа иң артых ӱгретчілерні паза тиксі ӱгредіг практикаларын табарға кӧріл парған.
Тархын
Школа программазына класстағы нимес урокты хайди даа кирердеңер «Знание» пірігіс чыылиинда 2022 чылның хандых айының 20-ҷі кӱнінде чарлалған. Ӱгредіг чылы пасталарына Россияның Просвещение министерствозы ӱгретчілерге методика чӧптерін тимнеп салған[1]. Россияда класс устағҷыларын наа дисциплинаа ӱгредерінҷе 700 ачых тоғынған[2].
Пастағы «Кирек нимедеңер чоохтазығ» урокты Россия президенті Владимир Путин 2022 чылның ӱртӱн айының 1-ғы кӱнінде Калининградсар чорых тузында иртірген. Азых урокта аралазарға хығыртылғаннар Россияның аймах городтарының олимпиада паза наука, культура, спорт киреендегі марығларның чиңісчілері. Урок пір ле темаа чарыдылбаан: аның араласчылары президентке постарына аарлығ киректердеңер чоохтап пиргеннер, наука, тархын, экология сурығларын пиргеннер. Уроктың стенограммазы Россия Президентінің сайтында сығарылған[3].
Тиксі Россияның школаларында пастағы «Кирек нимедеңер чоохтазығ» урок ӱгредіг чылының пастағы пас кӱнінде, ӱртӱн айының 5-ҷі кӱнінде, иртірілген. Уроктың темазы «Піліс кӱні» полған. Уроктың темалары полған на неделяя азынада, ӱгредіг чылы тоозылғанҷа, кӧріл парғаннар. Оларның аразында тархында полған киректер, саблығ кізілернің чуртас чолы, Россияның ӱлӱкӱннері, чонға тузалығ проекттер паза пасхазы[4].
Уроктың материалларын Россияның ӱгредіг академиязының Ӱгредігнің тиліс стратегиязы институды тимнеп салған[5]. Темалар паза уроктар планнары наука тоғыстары, педагогика литературазы паза нормативнай-правовой пічіктер хоостыра таллалғаннар[6]. Проектті чуртасха кирче Олған тузы, сӧбіре паза воспитание істезіглері институды.
2024 чылдаң сығара «Кирек нимедеңер чоохтазығны» олған садтарында 5 час ас парған олғаннарға иртір сыхханнар. Андағ сурығнаң улуғ паза тимнегліг группаларда кічіг ӱгренҷілерге кӧріл парған методикаларҷа тоғынчатхан олған садтарының воспитательлері айланғаннар, олар пирілген темалар олғаннарға хынығ полчатханын таныхтааннар[7]. Россияда 2025 чылның кӱрген айында пастағы уроктарны Вологданың олған садтары киргеннер[8].
Уроктың пӱдізі
Занятиелерні неделяда пір хати, пас кӱнде пастағы урокта, иртірері кӧріл парған. Ол 1-ғы класстаң пасти 11 классха теере хайди даа иртірілче. Полған на урок Россия гимнінең паза хазна флагын кӧдірерінең пасталча.
Полған на урокха методика материаллары тимнелгеннер. Олар ӱгренҷілернің чазы хоостыра 5 категорияа чарылчалар: 1-2 класстарға, 3-4 класстарға, 5-7 класстарға, 8-9 класстарға, 10-11 класстарға. Ідӧк ортымах профессиональнай ӱгредігнің колледжтеріне тимнелген материаллар парлар[9].
Полған на категорияа сценарий, методика материаллары, видеороликтер, презентациялар паза плакаттар кірчелер. Улуғ класстарға хоза материаллар кӧріл парғаннар. Ӱгренҷілер, видео кӧріп, интерактивнай чахығларны толдырып, урокты ӱзӱрігнең тоос саларға киректер. Ӱгретчі, тізең, позы кӧрче, пирілген сценарийнең паза материалнаң тузаланарға алай урокты пасха оңдайнаң апарарға[4].
Кӧп темаларҷа пазылған видеоларда таллалған темаларда эксперттер саналчалар федеральнай спикерлер араласчалар. Іди «Россияның легендалары» темаҷа Хазна думазының кнес орынҷызы Пётр Толстой чоох тутхан, Волонтёр кӱні темаҷа — «Старость в радость» чыындының тӧстегҷізі Елизавета Олескина, «Россия — хазых хазна» темаҷа — олимп чемпионы Максим Траньков. Видео ікі кізі чооғы оңдайынаң пӱдірілче: спикерлер олғаннарның сурығларына нандырчалар[4].
Уроктарға материаллар «Разговоры о важном» официальнай сайтта сығарылчалар. Оларны посха тартып аларға чарир, ол санда ирткен чыллардағыларын.
Сыйых
2025 чылға Россияда «Кирек нимедеңер чоохтазығ» урогының 105 занятиезі ирт парған. Анда 20 миллион азыра ӱгренҷі араласхан. Федеральнай спикерлер аразында 120 халых паза федеральнай ведомство кізізі чоох тутхан. Ӱгредіг материалларын тимнирінде араласханнар Россияның ӧӧн компаниялары: Россияның тимір чоллар, Росатом, Сбербанк, Пастағы канал, Артек, Россияданың чаа-тархын пірігізі паза пасхалары.
Проекттің чонға тузазын санға алып, тиксі Россиядағы чыл сай пирілчеткен «Кирек нимедеңер чоохтазығ» сыйыхты тӧстирінеңер чарадығ алылған. Сыйых хоостыра тӧрт номинация кӧріл парған:
- Чылнын иң артых интервьюзы;
- Видеоанонстарның иң артых ведущайы;
- Партнеррлардаң иң артых занятие;
- «Первые. Разговоры о важном» сериалның иң артых актёры (серия).
Ӱгретчілерге «Кирек чоохтазығ тимнеп» тіп ӧнетін номинация тӧстелген. Марығда занятиені тимнеен автор тоғыстары, методика материаллары, ӱзӱріг уроктарының видеозаписьтері аралазар оңдайлығлар.
Чарғыҷылар санына Олған тузы, сӧбіре паза воспитание істезіглері институдының тоғынҷылары, тиксі Россиядағы іҷе-пабалар комитедінің кізілері паза «Кізі ӧскірерге» марығның чиңісчілері кірчелер[10].
Алған орын
- ↑ «Разговоры о важном» в школе: что это и какие темы обсуждаются, Коммерсантъ (11 Кӱрген айы 2024). Дата обращения: 22 Сілкер айы 2025.
- ↑ Кравцов: «Разговоры о важном» позволят интересно рассказать о ценностях и истории России. Минпросвещения России. Дата обращения: 22 Сілкер айы 2025.
- ↑ Открытый урок «Разговор о важном», Президент России. Дата обращения: 22 Сілкер айы 2025.
- ↑ 1 2 3 Разговоры о важном. Министерство просвещения Российской Федерации. Дата обращения: 22 Сілкер айы 2025.
- ↑ Разговоры о важном. Методические рекомендации. Институт стратегии развития образования.
- ↑ Классный час "Разговоры о важном" 2025-2026: что это такое, программа, темы уроков, Комсомольская правда. Дата обращения: 22 Сілкер айы 2025.
- ↑ Путин поддержал идею проводить "Разговоры о важном" в детских садах, РИА Новости (3 Чарыс айы 2024). Дата обращения: 22 Сілкер айы 2025.
- ↑ Власти Вологды первыми в стране ввели еженедельные «Разговоры о важном» в детсадах, Известия (21 Кӱрген айы 2025). Дата обращения: 22 Сілкер айы 2025.
- ↑ Разговоры о важном в колледже: как организовать внеурочные занятия для СПО. Единый всероссийский институт дополнительного профессионального образования. Дата обращения: 22 Сілкер айы 2025.
- ↑ Старт первой Всероссийской премии «Разговоры о важном» (12 Сілкер айы 2025). Дата обращения: 22 Сілкер айы 2025.