Чоннар аразындағы заповедниктер кӱні
| Чоннар аразындағы заповедниктер кӱні | |
|---|---|
 Национальнай парк Абиску. Заполярьедегі пастағы национальнай швед паркы | |
| Тӧстелген | 2000 чылда Чоннар аразындағы чир-чайаанны хайраллаҷаң пірігістің пастаанаң |
| Таныхталчатхан орны | чыл сай |
| Кӱні | Сілкер айының 24-ҷі кӱні |
| Палғалыстығ | 1909 чылда Швецияда национальнай парктар тӧстелгенінең |
Чоннар аразындағы заповедниктер кӱні — Чоннар аразындағы чир-чайаанны хайраллаҷаң пірігістің пастаанаң чыл сай тиксі тилекейде сілкер айының 24-ҷі кӱнінде таныхталчатхан ӱлӱкӱн. Заповедниктерні хайраллап арачылапчатхан кізілернің профессия ӱлӱкӱні полча.
Тархын
1909 чылның сілкер айының 24-ҷі кӱнінде Швецияда национальнай парк тӧстелген. Национальнай парктар паза резерваттар системазы Европада пастағызын на пу хазнала пол килген.
Чоннар аразындағы заповедниктер кӱні Чоннар аразындағы чир-чайаанны хайраллаҷаң пірігістің (МСОП) пастаанаң 2000 чылдаң сығара чыл сай таныхталча. Ӱлӱкӱннің ӧӧн пӧгіні чир-чайааны паза аң-хустарны хайраллиры полча[1][2].
Россияда алынҷа Заповедниктер паза национальнай парктар кӱні пар, ол кӱрген айының 11-ҷі кӱнінде таныхталча. Пу кӱн хазнада пастағы заповедник, Баргузиндегі хайраллалчатхан чирнің, тӧстелгеніне чарыдылча.
Тархын кибірлері
Пу кӱнде парктарның паза заповедниктернің чирлерінде кӧзідіглер азылчалар, экскурсиялар, чир-чайааны хайраллирына чарыдылған лекциялар, фестивальлар паза пасха мероприятиелер иртірілчелер.
Заповедниктер
Заповедниктер — ӧзімнерні паза аң-хустарны, водопадтарны, пурунғы хуйуларны, хайаларны хайраллир пӧгіннең кізее хайынарға чарадылбинчатхан чирнің алай акваторияның чардығы[3].
Тилекейдегі пастағы заповедник Шри-Ланкада пістің эра алнындағы III чӱс чылда тӧстелген. Ол туста Деванампиятисса хан ӧнетін законҷа олтырыхтың пірее чирлерінде кізілеріне кірерге чаратпиныбысхан. Іди ол чирлерні позына паза тӧліне артыс салған[4].
Чоннар аразындағы чир-чайаанны хайраллаҷаң пірігістің танығларынаң, 2024 чылда тилекейде 6555 национальнай парк паза 630 азыра чир-чайаанның биосфера заповеднигі саналған, олар 119 хазнада орныхчалар[5].
Тилекейдегі иң улуғ заповедник Африкада орныхча. Ол Ӱстӱнзархы Африка Республикадағы Крюгернің национальнай паркы, Мозамбиктегі Лимпопо национальнай парк паза Зимбабведегі Гонорежу национальнай парк піріктіріліп тӧстелген. Аның тиксі улии — 35 муң кв. километр[6]. Иң кічіғ заповедниктернің пірсі, Галичья Гора тіп заповедник, Россияда орныхча. Аның улии 2,3 км² тиңнелче[7].
Галерея
Серенгети. Танзанияның ӱстӱнзархы чардығындағы национальнай парк
Баргузиндегі заповедник. Россия (Бурятия)
Шри-Ланканың национальнай паркы
Вилпатту. Шри-Ланка. Тилекейдегі иң пурунғы заповедник
Лимпопо транснациональнай парк. Тилекейдегі иң улуғ парк.
Алған орын
- ↑ 24 мая отмечается Международный день заповедников. gorodirkutsk.ru. Город Иркутск.РУ (22 Сілкер айы 2019). Дата обращения: 25 Хосхар айы 2025.
- ↑ Заповедный мир "Ненецкий", Русское географическое общество (24 Сілкер айы 2023). Дата обращения: 25 Хосхар айы 2025.
- ↑ Что такое заповедник, и чем он отличается от заказника: примеры, Моя планета. Дата обращения: 25 Хосхар айы 2025.
- ↑ Национальные парки Шри-Ланки. travellanka.ru. Дата обращения: 25 Хосхар айы 2025.
- ↑ Тамара Казарина. Заповедные места, ТАСС. Дата обращения: 25 Хосхар айы 2025.
- ↑ В Африке создан крупнейший национальный парк, РИА Новости (11 Улуғ хырлас айы 2002). Дата обращения: 25 Хосхар айы 2025.
- ↑ Международный день заповедников, Парламентская газета (24 Сілкер айы 2019). Дата обращения: 25 Хосхар айы 2025.
|
Пу материал «РУВИКИ» интернет-энциклопедия» АНО холында. Пу материалнаң пасха сайттарда «РУВИКИ» интернет-энциклопедия» АНО чарадиинаң на тузаланарға чарир. |