Пособиелерні паза пенсияларны саннығ салковайнаң тӧлирі
| Пособиелерні паза пенсияларны саннығ салковайнаң тӧлирі | |
|---|---|
 | |
| Пасталғаны | 2025-2026 |
| Орын | Россия |
| Сылтағ | Переводтар идерінде хорадығларны хызырары |
Пособиелерні паза пенсияларны саннығ салковайнаң тӧлирі (орыс. Вы́плата посо́бий и пе́нсий в цифровы́х рубля́х) — Россияда саннығ салковайны изерістіре кирері хоостыра хазнаның социальнай тӧлеглерні саннығ форматха айландырғаны. Саннығ салковай — холдағы ахча паза холда тутпас ахча формаларының оңдайларын піріктірчеткен ахчаның ӱзінҷі формазы[1].
2025 чылның чарыс айының 1-ғы кӱнінең сығара федеральнай бюджеттің пірее тӧлеглері саннығ салковайнаң иділер. Ол санда анзы хайзы социальнай пособиелерге теелер. 2025 чылның от айының халғанҷы кӱннеріне правительство тӧлеглернің хап-орта изерізін сығарбаан. 2026 чылдаң сығара хазна хайдағ даа тӧлеглер кӧрімінде наа форматнаң тузалан полар, ол санда пенсияларда паза бюджет тоғынҷыларының чал ахчазында[2].
Контекст
Россия Банкы саннығ салковайның сынағ проектін 2023 чылның кӱрген айында чуртасха кирген. Ол тустаң сығара физическай кізілер, банктар паза компаниялар саннығ салковайнаң операцияларны сынапчалар[3].
2025 чылның хосхар айының соонзар Россияның финанстар министрі [[[Силуанов, Антон Германович|Антон Силуанов]] 2026 чылда саннығ салковайның алғым кирілерін сахталчатханын искірген[4]. Ол тусха кирек финанс инфраструктуразы тоғын сығарға паза сыныхтал парарға кирек.
Саннығ салковай виртуальнай чирде тузаланылар: Россия Банкы саннығ салковайны саннығ код чіли сығарар, наа валютаның счёттары Ӧӧн Банктың платформазында поларлар[1].
Ахчаның наа формазы физическай паза юридическай кізілернің саннығ кошелёктарында хайраллалар. Кошелёктар хайдағ-да пір банкнаң палғалыстығ полбастар, че саннығ салковайнаң кибірліг оңдайларнаң, банк приложениелерінҷе, тузаланарға чарир полар. Кошелёкха клиенттің хайдағ даа банкы хоостыра кірерге чарир. Мыннаң андар саннығ салковайнаң интернет тее чох тузаланары кӧрілче[5].
Саннығ салковайларнаң тӧлеглер паза переводтар идерге чарир полар, ідӧк оларны холда тутпас ахчаа айландырарға чарир полар, анаң, анзы кирек полза, холдағы ахча чіли суурарға. Физическай кізілерге саннығ салковайдағы транзакцияларға банк комиссиялары салылбас. Оларға кредит пірігістерінің лимиттері тарадылбас. Юридическай кізілерге иң асхынах синніг комиссиялар полары кӧрілче[6].
Ӱлгӱ кізілері валютаның наа формазының трансграничнай переводтарны идерінде паза транзакцияларны хайығда тударында артығын таныхтапчалар[1].
Саннығ салковайны кирҷең график
2025 чылның от айының 15-ҷі кӱнінде Хазна Думазы саннығ салковайны изерістіре алғым кирерінеңер закон алыбысхан[7], хайзында президент 2025 чылның от айының 23-ҷі кӱнінде хол салыбысхан. Наа закон хоостыра, саннығ салковай 2026 чылның ӱртӱн айының 1-ғы кӱнінде халыхха алғым киріл сығар. Пастап ол иң килкім банктарға паза 120 млн азыра салковай парыстығ садығ сетьтеріне теелер, анаң 2028 чылға теере прай садығҷылар паза банктар кірерлер.
2025 чылның чарыс айының 1-ғы кӱнінең сығара саннығ салковайнаң федеральнай хорадығларның чардығында паза алынҷа социальнай пособиелерде тузаланарлар. Хайзыларына 2025 чылның от айының халғанҷызына пілдістіг полбаан.
2026 чылның кӱрген айының 1-ғы кӱнінең сығара саннығ салковайнаң федеральнай бюджеттің хайдағ даа тӧлеглерінде тузаланарлар. Анзы пенсияа, пособиее, стипендияа паза бюджет тоғынҷыларының чал ахчазына теелер.
2027 чылда саннығ салковай регионнарның тӧлеглерінде, ідӧк бюджеттегі нимес чыындыларның системаларында пол килер[2].
Пос кӧңні оңдайы
Ӧӧн Банкта саннығ салковайның кирілчеткені хоостыра анзы кӱснең иділбинчеткенін таныхтапчалар:
Кізілер, амғы туста чіли, салковайның хайдағ формазын тузаланарға постары кӧрерлер — холдағы ахчаны, холда тутпазын алай саннығны. Кізі позы таллап алар праволығ[8].
Россия чуртағҷызы саннығ салковайнаң тузаланарға ынабинчатса, ол саннығ кошелёкты аспас оңдайлығ[1]. Ол пособиелер паза пенсиялар алчатхан кізілерге теелче: олар тӧлеглерні алҷаң форматты пос алынҷа кӧрчелер (холда тутпас ахча, холдағы алай саннығ салковай)[2].
Пособиелерні тӧлирі
2025 чылның азығ айында «Интерфакс» агентствозы искіриинең, Россия Банкы Федеральнай казначествонаң хада социальнай пособиелер тӧлеглерінде паза тиксі тыхтағ тоғыстарының хорадығларында саннығ салковайнаң тузаланарынҷа сынағ иртірерге пӧгін тутчалар. Агенствоның танығларынаң, ол 2025 чылның орғах айының 25-ҷі кӱнінде поларға кирек. «Интерфакс» саннығ салковайның бюджет процезіндегі «чол картазындағы» тузаланызына сылтанча. Сынағ ӱртӱн айы тоозылғанҷа узарадыларға кирек. Олох туста пічікте хайдағ тӧлеглер сынағлар иртері чоохталбинча[9].
Алылған закон хоостыра, 2025 чылның чарыс айынаң сығара саннығ оңдайнаң пособиелернің чардығы тӧлелер[2]. Олох туста Ӧӧн Банктың танығларынаң саннығ кошелёк пос алынҷа пірдеезіне азылбас[8].
Эксперттернің танығларынаң, саннығ салковайдағы тӧлеглер ӱлгӱге килістірелер, ол хазнаа кӧстегліг ахчаның хорадығларын хайығда тударға оңдай пирче. Финанс пічии тилізінҷе ассоциацияның ӧӧн директоры Вениамин Каганов пу кирек хоостыра чарытхан:
…Бюджетке хазна ахчазы кӧстег хоостыра хатығ хорадыларға кирек. Кӧзідімге, олған пособиелеріне улуғлар араға паза тамкы албазыннар. Саннығ салковайнаң анзы полар[6].
Пенсияларны тӧлирі
Рунетте ӱлгӱ прай пенсияларны саннығ форматха айландырарға итчеткен тіп искіріглер сыхханнар. Россия Банкының сайтындағы искіріг хоостыра, андағ пӧгіннер чоғыллар[10].
2025 чылның азығ айында Хазна Думазының пос ниме-ноозы, чир паза ис-пай хайызығлары сурығларынҷа комитеттің кнезі Сергей Гаврилов социальнай сетьтердегі «Россияннар амды пенсияларны саннығ салковай кӧрімінде аларлар, аны хыйа идер ӱчӱн регуляторзар алай пенсионернең тоғынчатхан банкзар заявление ызарға кирек» тіп искірігні тайма чоох тіп адаан. Депутат хазна пенсияларны алҷаң чалғыс оңдайны ит полбас, мында кибірліг банк переводтарынаңар даа чоох апарылчатса, уламох саннығ ахчадаңар чоох парчатса, хайзылары наа тиріг полчалар тіп чарытхан[11].
Пенсия алчатхан кізі позы пенсиязын саннығ салковайда аларға итсе (2026 чылдаң сығара), аның ӱчӱн (паза пособиені саннығ форматта алар ӱчӱн) саннығ кошелёк азарға кирек полар. Анаң Социальнай чыындызар заявление пазарға кирек полар, анда тӧлеглерні саннығ кошелёксар аларға итчеткені искірілер паза номері кӧзіділер. СФР пенсионернің андағ заявлениезін албаанҷа, саннығ салковайнаң пенсия тӧлелбес. Соонаң ідӧк пенсияны саннығ салковайнаң тӧлелчеткенін хыйа идерге, хазна тӧлеглерін кибірліг оңдайларнаң аларға чарир полар[12].
Алған орын
- ↑ 1 2 3 4 Будут ли платить пенсии в цифровых рублях?. Дата обращения: 22 Орғах айы 2025.
- ↑ 1 2 3 4 С 1 октября 2025 года пособия и пенсии будут выплачивать в цифровых рублях. Что это значит для получателей, Банки.ру. Дата обращения: 22 Орғах айы 2025.
- ↑ Цифровой рубль | Банк России. cbr.ru. Дата обращения: 22 Орғах айы 2025.
- ↑ Силуанов ждет масштабного внедрения цифрового рубля в 2026 году, Interfax.ru (28 Хосхар айы 2025). Дата обращения: 22 Орғах айы 2025.
- ↑ Цифровой рубль | Банк России. cbr.ru. Дата обращения: 22 Орғах айы 2025.
- ↑ 1 2 Социальные выплаты в цифровых рублях. Насколько это реально? Мнения экспертов - Российская газета, Российская газета (10 Азығ айы 2025). Дата обращения: 22 Орғах айы 2025.
- ↑ Госдума определила сроки массового внедрения цифрового рубля, РИА Новости (20250715T1513). Дата обращения: 22 Орғах айы 2025.
- ↑ 1 2 Что такое цифровой рубль, зачем он и как работает, нужно ли заявление на отказ от цифрового рубля. | Банк России. www.cbr.ru. Дата обращения: 22 Орғах айы 2025.
- ↑ ЦБ и Казначейство РФ намерены осенью протестировать выплату пособий в цифровых рублях, Interfax.ru (5 Азығ айы 2025). Дата обращения: 22 Орғах айы 2025.
- ↑ Миф 4. Все зарплаты бюджетников и выплаты для пенсионеров переведут на цифровые рубли, как когда-то заставили всех перейти на «Мир». | Банк России. www.cbr.ru. Дата обращения: 22 Орғах айы 2025.
- ↑ В Госдуме назвали фейком сообщения о переводе пенсий в цифровые рубли, TACC. Дата обращения: 22 Орғах айы 2025.
- ↑ sberbank.ru. www.sberbank.com. Дата обращения: 22 Орғах айы 2025.