Кремль сыбызы
| Кремль сыбызы | |
|---|---|
 | |
| Удаа иртірілчеткені | чыл сай |
Кремль сыбызы — Россияда Кремльде чыл сай иртірілчеткен наа чыл кӧзідии. Аның ӧӧн чардығында олғаннар Соох апсахнаң тоғасчалар. Билеттер садылып пасталғанҷа, кибірли чарыс айына теере, фестиваль полтазы чазытта полча[1].
Наа чыл сыбызы Хазна Кремль ӧргезінде иртче. Москвадағы Кремльзер сӱлейке павильонҷа кірчелер, анда полған на кізіні сыныхтапчалар. Метронаң сыхчатхан чирде чол кӧзітчеткен постерлер хыс салчалар.
Тархын
Наа чылға Кремль алнындағы ачыхты сыбыларнаң чазаҷаң кибір 300 чыл мының алнында, I Пётрның тузында, кирілген. Император Наа чылны таныхтаҷаң кӱнні ӱртӱн айының пастағы кӱнінең кӱрген айының пастағы кӱніне кӧзірібіскен паза Москвадағы Собор ачығында пу кирек хоостыра сабаллығ ағастар одырт саларға чахығ пирген.
1917 чылға теере наа чыл сыбызын Кремльнің Собор ачығында турғысчаңнар. Пу кибірге 1996 чылда айланғаннар[2].
Кремльнің пастағы сыбыларын Соох апсахтың тӧреен чирі саналчатхан Великий Устюгтаң 1990 чылларның соонзар ағыл сыхханнар[3].
Наа чыл ағазын чайғы соонзар кии паза спутник палғалызынҷа тілепчелер. Москва облазының прай ағас хоныхтарынаң 50—70 ағас таллап алчалар. Наа чыл сыбызының тӧзі чіке, салаазы тӱс поларға кирек. Чазы хоостыра 95-тең ас парыбысхан ползын[2].
Москва кініндегі олғаннарға иртірілген наа чыл кӧзідіглері 1930 чылларда пасталғаннар. 1945 чыл алнынҷа андағ морсымнығ пайрам Союзтар туразында ирткен. 1954 чылдаң сығара наа чыл ӱлӱкӱні олғаннарға Кремльде иртіріл сыххан[4].
Кремль сыбызын иртірҷең кибір
Наа чыл ойыннары кӱннің сай улуғ хырлас айының халғанҷы кӱннерінең сығара кӱрген айының пастағы кӱннеріне теере иртірілчелер. Іди, 2024/2025 чыллар сезонында оларның 26-ҷы декабрьдаң 8-ҷі январьға теере узарадылары кӧріл парған, тынағ кӱні 1-ғы январьға килісче[5]. Кремль ӧргезінде ідӧк воскреснай школаларның, приюттарның паза олған тураларының оолағас-хызыҷахтарына полызығ чӧрім оңдайынаң наа чыл сыбызын иртірчелер. Андар билеттер садылбинчалар: олар пу учреждениелер олғаннарына пирілчелер.
Москвадағы Кремль чирінзер, наа чыл ойыны пасталғанҷа, 1 сағат 45 пағат алнынҷа, Кутафья башняның сӱлейке павильоннарынҷа иртірчелер.
Наа чыл сыбызы ойыны ікі чарылча: пастағызы ӱтертчең программа, ол фойеде иртче; ікінҷізі — ойын. Кӱнде ӱс ойын иртче: 10:30, 14:00 паза 18:00 сағатта. Сыбының пастағы чардығы 1 с. 15 пағат ойын алнынҷа иртче. Позы ойыны пір сағатча узарадылча[6]. Фойедегі программаа ойыннар паза марығлар кірчелер[7].
14 часха читкелектерні улуғлар чох кирбинчелер[8]. 14 час толдыр салған олғаннар постары ла аралазар оңдайлығлар. Испинчеткен кӧрігҷілерге ӧнетін сеанс иртірчелер; пас чӧрбинчеткен кинектерге полысчылар паза залда алынҷа орын кӧріл парған.
Полған на кӧрігҷі (іҷе-пабазы, пала) билеттіг поларға кирек, наа чыл сыйии алынҷа тӧлелче[7].
Льготалар
Наа чыл сыбызына тикке кірер оңдайлығлар:
- Профсоюзтар кізілері. Кремль сыбызын Москвадағы Профсоюзтар федерациязы тимнепче. Тоғыста профсоюзха кірчеткен іҷе-пабаларға билеттер тикке, ниик арах паазынаң пирілчелер, алай іҷе-пабалар билеттің чардығын на тӧлепчелер[1].
- Кӧп палалығ сӧбірелер паза пасха льготалығ кізілер. Тикке билеттерні социальнай полызығ пирҷең орындағы пӧліктерде пирчелер.
- Пистерге ӱгренчеткен олғаннар. «Тиксі Россиядағы сыбыға» ӱгредігде чидіге читкен олғаннар парчалар. Ол саңай пистерге ӱгренчеткен паза олимпиадалар чиңісчілері пол парған олғаннар, олар ӱгретчілерінең хада араласчалар.
Хоза искіріг
- 1992 чылда кӧклӧлер — Кремльдегі наа чыл кӧзідиинің араласчылары — Кремльнің тастынзар сыхханнар. Олар Наа чылға Кутафья башнязын паза Троицкай тахтаны чазап салғаннар[4].
- 2020/2021 сезонда коронавирус тарап сыххан туста Кремль сыбызы кӧрігҷілер чох ирткен. Аны телевидениеҷе кӧзіткеннер[9].
Алған орын
- ↑ 1 2 Полина Калмыкова. Как попасть на кремлевскую елку // Тинькофф Журнал : сайт. — 2023. — 24 октября.
- ↑ 1 2 Главная новогодняя ель России, РИА Новости (12 Улуғ хырлас айы 2022). Дата обращения: 14 Кічіг хырлас айы 2024.
- ↑ София Токарева. Главная елка страны – 2024: все секреты, как добраться и увидеть ее, Известия.
- ↑ 1 2 Елизавета Королёва. «Ребёнка надо удивить»: 60 лет назад новогодняя ёлка в Кремле стала сказочной. RT на русском (2 Кӱрген айы 2024). Дата обращения: 14 Кічіг хырлас айы 2024.
- ↑ Новогодние ёлочные представления (неопр.). Государственный Кремлёвский Дворец. Дата обращения: 14 Кічіг хырлас айы 2024.
- ↑ Кремлевская Ёлка. mtuf.ru. Дата обращения: 14 Кічіг хырлас айы 2024.
- ↑ 1 2 Кремлевская елка 2024-2025: как попасть, цена билета, подарок, Российская газета (27 Улуғ хырлас айы 2023). Дата обращения: 14 Кічіг хырлас айы 2024.
- ↑ Новогодние ёлочные представления. Государственный Кремлёвский Дворец.
- ↑ Кремлевскую елку впервые покажут по телевизору, ТВ Центр - Официальный сайт телекомпании (9 Кічіг хырлас айы 2020). Дата обращения: 14 Кічіг хырлас айы 2024.