Чоннар аразындағы адайлар кӱні
| Чоннар аразындағы адайлар кӱні | |
|---|---|
| Файл:2 июля.jpg | |
| Тип | Хазна синіндегі нимес |
| Таныхталчатхан орны | чыл сай |
| Кӱні | От айының 2-ҷі кӱні |
Чоннар аразындағы адайлар кӱні (орыс. Междунаро́дный день соба́к) — тиксі тилекейде адайларнаң айғасчатхан паза оларға хынчатхан кізілернің чыл сай 2 июльда таныхталчатхан ӱлӱкӱні[1]. Хазналар синінде пічікке кирілбеен кӱн полза даа, пу кӱнде ээлер адайларына тадылығ чиис, ойнаҷахтар, тиріглер алчалар. Волонтерлар адайлар тудылчатхан орыннарзар чииснең имнерні ағылчалар.
Тархын паза кибірлер
2012 чылда Чоннар аразындағы социальнай пастағлар чыындызы ООН-зар (Піріктірілген Нациялар Пірігізі) от айының 2-ҷі кӱнінде ӱлӱкӱнні таныхтирынаңар айланыс иткен. Ол сағыс чуртасха кирілбеен дее полза, тилекейнің кӧп хазналары ӱлӱкӱнні таныхтап сыхханнар[2].
Пу кӱнде тиксі тилекейдегі кинологтар пірігістері адайларның аймах кӧрімнерінің кӧзідіглерін иртірчелер. Адайларға хабазызар чӧрімнер иртче: олар чиис аларға, чуртаҷаң орыннарны тимнирге полысчалар. Полысчылар приюттарзар киліп, адайларнаң айғасчалар, оларнаң хада ойнапчалар.
Чоннар аразындағы адайлар кӱнінде лекциялар иртірілчелер, анда адайларнаң хатығ нимес айғазарға ӱгретчелер, чонны оларға полызарға кӧӧктірчелер.
Искіріглер пирчеткен пірігістер адайлардаңар фильмнер кӧзітчелер, аймах подразделениелернің кинологтар службазындағы хозымнарынаңар чоохтапчалар, саблығ адайларны сағысха кирчелер.
Чапсых танығлар
A-Z-Animals компанияның Тиксі илекейдегі хазых хайраллаҷаң пірігіске (ВОЗ) тӧстенчеткен танығларынаң, тилекейде 2022 чылда 900-че миллион адай полған. Оларның аразында 75—85 % пос алынҷа чӧрчеткеннері полған. Прай, тізең, ээзі чох 200 миллион адай саналған, хайзылары сас адайлардаң пасха хаҷан-да ибде чуртааннар[3].
2023 чылда мал-хустарның чіҷең нимезін паза чуртас оңдайларын хайығда тутчатхан кін паза Ipsos істезіг компаниязы істезіглер иртіргеннер, аның хоостыра, тиксі тилекейде ээліг адайлар санынҷа Россия тӧртінҷі орында пол парған. Оларның саны 25,5 млн читкен[4].
Хайзы хазналарда пос Адай кӱні таныхталча. США-да, Канадада паза оларның хости орныхчатхан хазналарда орғах айының 26-ҷы кӱнінде Адайға алғыстас кӱні таныхталча. Ол кӱн 2004 чылда США-да Адайның национальнай кӱні чіли кирілген, аның пастағҷызы ибдегі мал-хусның эксперті Колин Пейдж. Пу кӱнде аның пабазы ағаа пастағы адайын сыйлап пирген. Соонаң ол кӱн хазна озаринда таныхтал сыххан[5].
Непалда ӱлӱкӱн киртініснең палғалыс парған, ол Тихарның пис кӱн иртчеткен «от фестивальының» («фестиваль огней» Тихар) ікінҷі кӱнінде таныхталча. Непалда адай ызых аңа саналча, олар ӧлім худайы Йаманаң чоох алысчалар тіп саналча. Пу кӱнде адайларны чахайахтығ гирляндаларнаң чазап, тадылығ чииснең азырапчалар[6].
Японияда прай адайларның кӱні Хатиконы хумартхылир кӱнінең палғалыстығ паза кӱрген айының 11-ҷі кӱнінде таныхталча. Акита-ину кӧрімі адай Японияда киртіс тании полча, ол ӱреен ээзі соонҷа Сибуя станциязар кӱннің сай тоғыс чыл изере кил турған. Андағ хайығ японнарны тың хайхатхан, аннаңар олар ағаа хумартхы тас турғыс пиргеннер[2][7].
Ідӧк кӧріңер
Алған орын
- ↑ 2 июля – международный день собак. Российская кинологическая федерация (2 От айы 2019). Дата обращения: 23 Сілкер айы 2024.
- ↑ 1 2 2 июля - Международный день собак. Центральная городская библиотека Северска (1 От айы 2021). Дата обращения: 23 Сілкер айы 2024.
- ↑ Volia Schubiger. How Many Dogs Are In The World? (англ.). A-Z-Animals.com (29 Ӱртӱн айы 2022). Дата обращения: 23 Сілкер айы 2024.
- ↑ Численность домашних питомцев в России за три года выросла на 11% — опрос. Регнум. Дата обращения: 23 Сілкер айы 2024.
- ↑ Национальный день собаки в США. Мeet-usa.com (26 Орғах айы 2019). Дата обращения: 23 Сілкер айы 2024.
- ↑ Все лучшее - собакам: праздник в Непале, восхваляющий четвероногих друзей человека. Культурология. Дата обращения: 23 Сілкер айы 2024.
- ↑ В Японии отмечают сто лет со дня рождения пса Хатико. РИА Новости (11 Кічіг хырлас айы 2023). Дата обращения: 23 Сілкер айы 2024.
|
Пу материал «РУВИКИ» интернет-энциклопедия» АНО холында. Пу материалнаң пасха сайттарда «РУВИКИ» интернет-энциклопедия» АНО чарадиинаң на тузаланарға чарир. |