Башкир тілі кӱні
| Башкир тілі кӱні | |
|---|---|
 | |
| Тип | Культура |
| Пасха | ba:Башҡорт теле көнө |
| Тӧстелген | Башкортостан Республика Пазы Радий Фаритович Хабировтың чахиинаң |
| Таныхталчатхан орны | 2019 чылдаң сығара |
| Кӱні | Улуғ хырлас айының 14-ҷі кӱні |
| Палғалыстығ | башкир кибелісчі Мифтахетдин Акмулланың тӧреен кӱнінең |
Башкир тілі кӱні (орыс. День башкирского языка) — башкир тілін хайраллап, аны арачылирына паза тилідеріне чарыдылған кӱн. Башкортостан Республиканың орыс тілінең хада хазна тіллерінің пірсі полча. Ол алтай тіллер сӧбірезінің тӱрк группазына кірче, пай тархыннығ паза культуралығ тіл полча. Башкортостан Республика пазы Радий Фаритович Хабировтың чахиинаң, 2019 чылдаң сығара Башкир тілі кӱні улуғ хырлас айының 14-ҷі кӱнінде таныхталча[1][2].
Тархын
Башкир тілі кӱнін тӧстир сағыс национальнай тілні хайраллап, аны тилідер, чииттернің хайиин тартар пӧгіннең тӧреен. Башкирлер — Башкортостан республиканың чилегеліг чоны. Оларның тілі посты чон чіли оңарарға паза культура ис-пайын хайраллирына улуғ хозым итче. Башкир кӱнін таныхтир кӱн, улуғ хырлас айының 14-ҷі кӱні, олаңай ла алыбаан, пу кӱнде саблығ башкир кибелісчі паза ӱгретчі Мифтахетдин Акмулла тӧреен.
Пу кӱнні 2015 чылда Тиксі тилекейдегі башкирлер курултайы пастаанаң Башкортостан Республиканың Чоннар ассамблеязының паза Башкортостан Республиканың ӱгредіг паза наука министерствозының хабазиинаң таныхтап сыхханнар. 2019 чылдаң сығара ол пічікке кирілген. Полған на культуралығ, ӱгредігліг кізі тӧреен тілін, пос тамырларын ӱгренерге, іҷе-пабазын паза ӧбекелерін аарлап-улуғлирға кирек. Тӧреен тіл кізіні пайытча паза пасха тіллерні ӱгренерге полысча[3].
Таныхтаҷаң кибірлер
Башкир тілі кӱнінде тілні тарадарына паза аны тилідеріне чарыдылған аймах мероприятиелер иртірілчелер. Школаларда паза вузтарда башкир тіліне паза литературазына чарыдылған уроктар апарылчалар, хығырығҷылар марығлары, викториналар, олимпиадалар, чайаачы иирлер, кӧзідіглер паза пасха культура чӧрімнері иртірілчелер. Пу кӱнде Башкортостан республикада паза аның тастыхти чирлерінде онлайн паза офлайн оңдайларда аймах чӧрімнер иртірілчелер.
Башкир писательлернің паза кибелісчілернің литература ис-пайын хайраллап, аны тилідеріне алынҷа хайығ салылча. Пу кӱнде Мифтахетдин Акмулла, Шайхзада Бабич, Мажит Гафури паза пасха саблығ литература кізілерін сағысха кирчелер.
Пу кӱнде чылның салтарын итчелер, иртірілген марығларның чиңісчілерінің аттарын адапчалар. Прай мероприятиелерде республиканың культура паза ӱгредіг учреждениелері араласчалар[4][2].
Башкир тілі кӱні Курай кӱні, Башкир теелбегінің кӱні паза Национальнай кип-азах кӱні чіли регионның ӱлӱкӱннері санына кірче. Ол чонға культура саринаң посты оңарарға полысча[5]
Алған орын
- ↑ День башкирского языка. Башкирский институт социальных технологий (филиал) Образовательного учреждения профсоюзов высшего образования «Академия труда и социальных отношений» (14 Улуғ хырлас айы 2023). Дата обращения: 5 Улуғ хырлас айы 2025.
- ↑ 1 2 Как в республике отметят День башкирского языка. Башинформ. (7 Улуғ хырлас айы 2022). Дата обращения: 5 Улуғ хырлас айы 2025.
- ↑ «Мелодичный башкирский язык». Culture.ru. Дата обращения: 5 Улуғ хырлас айы 2025.
- ↑ Сегодня в Башкортостане отмечается День башкирского языка. Министерство культуры Республики Башкортостан (14 Улуғ хырлас айы 2022). Дата обращения: 5 Улуғ хырлас айы 2025.
- ↑ Азат Гиззатуллин. В Башкирии 21 октября будет отмечаться День национального танца. Башинформ (13 Улуғ хырлас айы 2024). Дата обращения: 5 Улуғ хырлас айы 2025.